Шавкат Мирзиёев Лукашенкони туғилган куни билан табриклади

Бугун, 30 август куни Ўзбекистон Республикаси Президенти Шавкат Мирзиёев Беларусь раҳбари Александр Лукашенко билан телефон орқали мулоқот қилиб, икки томонлама муносабатларнинг долзарб масалаларини муҳокама қилди. Бу ҳақда Ўзбекистон етакчисининг матбуот хизмати хабар берди.

Маълум қилинишича, мулоқот аввалида давлат раҳбари Беларусь етакчисини таваллуд куни билан самимий табриклаб, унга мустаҳкам соғлиқ, бахт-саодат ва муваффақиятлар, Беларусь халқига эса тинчлик-осойишталик ва равнақ тилаган.

Ўз навбатида, Беларусь Президенти Ўзбекистон етакчиси ва кўп миллатли халқини яқинлашиб келаётган Мустақиллик куни билан самимий қутлаб, бардавом тараққиёт ва фаровонлик тилаган.

Жорий йил 8-9 июль кунлари Шавкат Мирзиёевнинг Минск шаҳрига расмий ташрифида эришилган келишувларни амалга ошириш доирасида Ўзбекистон – Беларусь стратегик шериклик муносабатларини янада ривожлантиришнинг долзарб масалалари кўриб чиқилган.

Шунингдек, самарали мулоқот ва алмашинувлар, шу жумладан, икки мамлакат ҳудудлари даражасида амалга оширилаётгани мамнуният билан қайд этилган.

Маълум қилинишича, йил бошидан буён мамлакатлар ўртасида товар айирбошлаш ҳажми 28 фоизга ошган. Хусусан, қишлоқ хўжалиги, машинасозлик, фармацевтика, электротехника, енгил саноат ва иқтисодиётнинг бошқа тармоқларида кооперация лойиҳалари амалга оширилмоқда.

Билдирилишича, етакчилар мулоқотда бўлажак икки томонлама учрашув ва тадбирлар режасини ҳам муҳокама қилган.

Эслатиб ўтамиз, жорий йилнинг 24 июль куни Ўзбекистон Республикаси Президенти Шавкат Мирзиёев ва Беларусь Республикаси Президенти Александр Лукашенко ўртасида бундан аввалги телефон орқали мулоқот бўлиб ўтганди. Унда Лукашенко Ўзбекистон етакчисининг таваллуди билан қутлаган эди.