Шавкат Мирзиёев Фабио Каннаварони табриклади

Бугун, 22 май куни Ўзбекистон Президенти Шавкат Мирзиёев футбол бўйича Ўзбекистон миллий терма жамоаси билан учрашуви чоғида жамоа мураббийи Фабио Каннаварони табриклади. Бу ҳақда Ўзбекистон Президенти матбуот котиби Шерзод Асадов хабар берди.

Маълум қилинишича, учрашув чоғида терма жамоа билан катта тажриба ва чемпионлик характерига эга Фабио Каннаваро бошчилигидаги мураббийлар штаби ишлаётгани қайд этилган.

“Фурсатдан фойдаланиб, Фабио Каннаварони мураббий сифатида мундиалдаги биринчи иштироки билан табриклаб, мураббийлар штабига янги зафарлар тилайман”, деган Президент.

Маълумот учун, 2006 йилда Германияда ўтказилган мундиалда Каннаваро сардорлик қилган Италия терма жамоаси жаҳон чемпиони бўлган. Ўша йили Каннаваро дунёнинг энг яхши ўйинчиси деб эътироф этилган ва футбол тарихида “Олтин тўп” соҳиби бўлган кам сонли ҳимоячилардан бирига айланган.

Янги мураббий жисмоний тайёргарлик ва ҳужумчилар билан ишлайдиган мураббийларни, шифокор, нутрициолог ва ошпазларни олиб келгани ҳамда халқаро тажрибага эга яхши жамоани шакллантиргани таъкидланган.

Эслатиб ўтамиз, учрашув давомида Шавкат Мирзиёев Ўзбекистонда футбол тизимида коррупция ва таниш-билишчилик деган иллатларга барҳам берилгани ҳақида гапирганди.