Шарль Мишель Россиянинг Африка давлатларига 1 млн тонна дон ажратиш таклифини танқид қилди

Европа Кенгаши раҳбари Шарль Мишель Россия, Туркия ва Қатарнинг Африка давлатларига 1 миллион тонна Россия донини етказиб бериш ташаббусини танқид қилди. Бу ҳақда у Ҳиндистондаги G20 саммитида айтиб ўтди.

Сиёсатчининг айтишича, дон йўлаги 30 миллион тонна Украина донини энг қашшоқ мамлакатларга экспорт қилиш имконини берган.

Бирлашган Миллатлар Ташкилоти маълумотига кўра, энг камбағал ва ўртача даромадли давлатлар дон битими доирасида буғдойнинг 40 фоизини олган. Россия томони эса ушбу кўрсаткич атиги 3 фоиз эканини билдирган.

“Қора денгиз келишуви 30 миллион тонна донни асосан қашшоқ мамлакатларга экспорт қилиш имконини берди. “Бирдамлик йўлаклари” – Европа Иттифоқи томонидан ишлаб чиқилган муқобил йўллар орқали аллақачон 40 миллион тонна ғаллани эҳтиёжманд давлатларга етказиб бериш мумкин. Шуни била туриб Россиянинг қўллаётган “саховатпешалик” сиёсати, Африка мамлакатларига нисбатан ҳурматсизликдан бошқа нарса эмас”, деган у.

Маълумот ўрнида, дон шартномаси (Қора денгиз ташаббуси) 2022 йил июль ойида Истанбулда Россия, Украина, Туркия ва БМТ томонидан келишилган. Битим икки қисмдан иборат эди: Одесса, Черноморск ва Южний портларидан Украина ғалласини хавфсиз экспорт қилиш тўғрисидаги келишув, шунингдек, Россия қишлоқ хўжалиги маҳсулотлари ва ўғитларининг жаҳон бозорига киришига чекловларни олиб ташлаш бўйича РФ-БМТ меморандуми.