Шакирага жарима ёки қамоқ жазоси хавф солмоқда

Топган даромадидан солиқ тўламаганликда айбланаётган колумбиялик қўшиқчи Шакирани иши Испания судида кўриб чиқиладиган бўлди. Бу ҳақда “FOX” нашри хабар бермоқда

Аввалроқ, Шакира Испанияда 2012 йилдан 2014 йилгача олинган даромаддан 14,5 миллион евро солиқ тўлашдан бўйин товлаганликда айбланаётгани ҳақида хабар берган эдик. Қўшиқчининг ўзи бу ҳолатни Багама оролларида яшагани ва Испанияда йил ҳисобига кўра 183 кундан кам бўлгани билан изоҳлаган. Аммо, Испания солиқ инспекторларининг фикри Шакираникидан бошқача. Уларнинг сўзларига кўра, ўша пайтда қўшиқчи турмуш ўртоғи Жерар Пике билан истиқомат қилган ва ушбу даврда Шакира 183 кундан ортиқ Испанияда яшаган. Шакиранинг ана шу даврда Багама оролларида яшаш учун рухсатномага эга бўлиши эса солиқдан қочиш учун ишлатилган ниқоб бўлиши мумкин.

Бир неча ҳафта олдин, 45 ёшли Шакира Испания прокуратураси билан ушбу масала бўйича келишувга эришишдан бош тортди ва агар керак бўлса, судга келишга ва ўз номини оқлашга тайёрлигини билдирди.

Ҳолат бўйича хонанданинг вакили ҳам изоҳ берган, унинг таъкидлашича, Шакира айбсизлиги исботланишига шубҳа қилмаяпти.

“Афсуски, солиқ тўловчилари билан бўлган ҳар икки даъводан биттасида мағлуб бўлаётган Испания солиқ идораси унинг ҳуқуқларини поймол қилишда ва яна бир асоссиз ишни давом эттиришни тўхтамаяпти. Шакира суд жараёни якунига қадар унинг айбсизлиги исботланишига ишончи комил”, дейди у.

Суд мажлиси санаси ҳали аниқланмаган. Агар хонанда айбдор деб топилса, у 24 миллион евро жаримага тортилиши ёки 8 йиллик қамоқ жазосига ҳукм этилиши мумкин.

Маълумот ўрнида, Шакира 1977 йилнинг 2 февраль куни Колумбиянинг Барранкилья шаҳрида туғилган. 1990 йилдан буён хонандалик фаолиятини давом эттириб келмоқда. У “Грэмми”, “MTV Video Music Awards”, “Billboard Music Awards” мукофотларини қўлга киритган. Шакира томонидан 2010 йилда Жанубий Африка Республикасида бўлиб ўтган футбол бўйича Жаҳон чемпионати учун куйланган “This Time for Africa” таронаси унга катта шуҳрат келтирган.