Сербияда намойишлар авж олмоқда. Полиция иштирокчиларни қўлга олди

Кеча, 18 август куни тунда Сербия ҳуқуқни муҳофаза қилиш органлари ҳукуматга қарши ўтказилган норозилик намойишлари вақтида юз берган тартибсизликларда 19 кишини қўлга олди. Бу ҳақда EFE агентлиги хабар берди.

Қайд этилишича, норозилик намойишлари Белградда ҳамда мамлакатнинг бошқа бир қатор шаҳарларида ўтказилган. Намойишчилар ва полиция ўртасида кўплаб тўқнашувлар юз берган. Шунингдек, иштирокчилар ҳукмрон Сербия “Прогрессив” партияси штаб-квартирасида тартибсизликлар уюштирган.

Мамлакат шаҳарларида вазият ўтган ҳафтадан буён кескинлашган. Намойишчилар кечки ва тунги соатларда полиция билан қарама-қаршиликка киришмоқда, йўлларни тўсмоқда.

Талабалар ташкилотлари бошчилигидаги Сербия мухолифати тўққиз ойдан бери норозилик намойишларини ўтказмоқда. Улар ўтган йил 1 ноябрь куни Нови-Сад вокзалидаги бетон соябон қулаши оқибатида 16 киши ҳалок бўлганидан кейин бошланган. Намойишчилар фожиа учун айбдорларни жазолаш, коррупцияга қарши курашни кучайтириш ва муддатидан олдин сайловлар ўтказишни талаб қилмоқда.

Январь ойида Сербия бош вазири ва Нови-Саднинг собиқ мэри Милош Вучевич норозилик намойишлари туфайли истеъфога чиқди. Мамлакат парламенти бу қарорни март ойида тасдиқлади.

Ҳукуматнинг янги раҳбари тиббиёт профессори Журо Макут бўлиб, унинг номзоди Вучич томонидан таклиф қилинган.

Эслатиб ўтамиз, аввалроқ Сербия Президенти Александр Вучич ҳокимиятни сақлаб қолиш учун конституцияни ўзгартирмаслиги ва ўз номзодини қайта илгари суришни режалаштирмаётганини айтганди.