Сенатор Бахтиёр Сайфуллаев вафот этди

Ўзбекистон Республикаси Олий Мажлиси Сенатининг Ёшлар, маданият ва спорт масалалари қўмитаси раиси Бахтиёр Сайфуллаев 72 ёшида вафот этди. Бу ҳақда Маданият ва туризм вазирлиги Матбуот хизмати хабар берди.

Бахтиёр Сайфуллаев – Ўзбекистон маданият арбоби, сиёсат ва давлат арбоби, педагогика фанлари доктори (1987), профессор (2012). У 1951 йили 1 апрелда Тошкент шаҳрида туғилган. 1972 йилда Тошкент давлат театр ва рассомлик санъати институтини тамомлаган. 

Ўз меҳнат фаолиятини 1972 йилда Республика ёш томошабинлар театри актёри ва режиссёри сифатида бошлаган Бахтиёр Сайфуллаев кейинчалик Ўзбекистон Республикаси Маданият вазири лавозимида ҳам фаолият олиб борган. У 2017-2020 йиллар давомида Ўзбекистон маданият вазири сифатида фаолият юритган. 

Шунингдек, Сайфуллаев Ўзбекистон Республикасида хизмат кўрсатган маданият ходими (2000), Қорақалпоғистон Республикасида хизмат кўрсатган маданият арбоби (2008) унвонларига сазовор бўлган.

"Маданият ва туризм вазирлиги жамоаси Сайфуллаев Бахтиёр Сайфуллаевичнинг вафоти муносабати билан унинг оила аъзолари ва яқинларига ҳамдардлик билдиради", дейилади хабарда.