Сенат Трампнинг ҳарбий ваколатларини чеклашдан бош тортди

АҚШ Сенати қонунчиларнинг Президент Дональд Трампнинг Эронга қарши ҳарбий ҳаракатларини чеклаш бўйича иккинчи уринишини рад этди ва ҳарбий ваколатлар тўғрисидаги резолюцияни қўллаб-қувватламади. Ҳужжат учун 47 сенатор овоз берди, 53 нафари эса қарши чиқди. Бу ҳақда “Politico” хабар берди.

Демократлар томонидан таклиф этилган ташаббус маъмуриятдан АҚШнинг можародаги иштирокини Конгресс розилигисиз тўхтатишни талаб қилган. Март ойи бошидаги каби резолюцияни қўллаб-қувватлаган ягона республикачи Кентуккидан Ренд Пол бўлган, демократлар орасида эса Пенсилвания сенатори Жон Феттерман қарши овоз берган.

Демократлар Трамп конституцияга зид уруш олиб бораётганини таъкидлаб, Пентагон раҳбари Пит Ҳегсет ва Давлат котиби Марко Рубиодан кампаниянинг мақсадлари, вазифалари ва харажатларини тушунтириб беришлари учун очиқ эшитувлар ўтказишни талаб қилмоқда.

“Биз америкаликлар лойиқ бўлган очиқ жавобларни олмагунимизча, уларни қайта-қайта овоз беришга мажбур қилишда давом этамиз”, дейди сенатор-демократ Тим Кейн.

Ўз навбатида, республикачи сенатор Том Коттон резолюцияни зарарли деб атаб, у Трампга “Эроннинг ҳарбий салоҳиятини заифлаштириш вазифасини якунлашга” тўсқинлик қилишини айтган.

Демократлар ҳарбий ваколатлар бўйича аллақачон олтита резолюция киритган. Бу ҳужжатлар процессуал хусусиятлари туфайли стандарт 60 та овозли тўсиқни четлаб ўтиб, тезлаштирилган овоз бериш имконини беради. Бу озчиликка Сенат ишини чўзиш, жумладан, республикачилар учун устувор бўлган, овоз бериш қоидаларини кучайтирувчи Трампнинг SAVE America Act қонун лойиҳасини кўриб чиқишни тўсиб қўйиш имконини беради.

Республикачилар Трампни қўллаб-қувватлаётганига қарамай, сўровномалар Эрондаги уруш оммабоп эмаслигини кўрсатмоқда — америкаликларнинг атиги 29 фоизи зарбаларни маъқуллайди. Демократлар 13 нафар америкалик ҳарбийнинг ҳаётига зомин бўлган ва кўп миллиардлик харажатларни талаб қилаётган можаронинг чўзилиши республикачиларни ўз позицияларини қайта кўриб чиқишга мажбур қилади деб умид қилмоқда.

Эслатиб ўтамиз, аввалроқ Пентагон Оқ уйдан Эронга қарши урушни молиялаштириш учун Конгрессга 200 миллиард доллардан ортиқ маблағ ажратиш сўрови билан мурожаат қилишни маъқуллашни сўрагани ҳақида хабар берилган эди.