Ор-номус учун ўлдирдик – Туркияда икки кишини бурдалаганлар қилмишини изоҳлади

Туркиянинг Истанбул шаҳри Умрония туманида икки ўзбекистонлик Сайёра Эргашалиева ва Дурдона Хакимованинг ўлдирилиши юзасидан олиб борилган тергов ишлари якунланди. Ҳибсдаги гумонланувчилар – ўзбекистонлик 31 яшар Дилшод Турдимуротов ва 29 яшар Ғофуржон Камолхўжаевга оғирлаштирилган умрбод озодликдан маҳрум қилиш жазоси сўралди. Бу ҳақда Туркия маҳаллий оммавий ахборот воситалари хабар берди. 

Аввал хабар берганимиздек, 2025 йилнинг 28 декабрь куни ишлаш мақсадида Ўзбекистондан Туркияга келган 32 яшар Сайёра Эргашалиева билан 2026 йилнинг 23 январидан буён оиласи боғлана олмаган. Бу ҳақда ҳуқуқ-тартибот органларига келиб тушган хабар асосида олиб борилган қидирувларда Сайёранинг охирги марта ўзбекистонлик Дурдона Хакимова бўлаклаб ўлдирилган уйда қолгани аниқланган. 

Тергов гуруҳи камера ёзувларини ўрганиб, 23 январь куни уйга кирган Сайёранинг ортидан Ҳакимованинг қотиллари Дилшод Турдимуротов ва Ғофуржон Камолхўжаев ҳам кирганини аниқлаган. Кузатув камераси ёзувларида 24 январь куни гумонланувчиларнинг уйдан бир неча бор қора чиқинди қоплари билан чиққани, сўнгра оқ рангли жомадон билан манзилни тарк этгани аниқланган. Гумонланувчиларнинг тижорат таксисида Фотиҳ туманига келиб, жомадондаги тана қисмларини бир чиқинди контейнерига ташлагач, Еникапи Мармарай бекатига пиёда кетгани маълум бўлган. Тергов доирасида Дурдона Ҳакимова қотиллиги сабабли ҳибсда сақланаётган Дилшод Турдимуротов ва Ғофуржон Камолхўжаев билан ўтказилган сўроқлар давомида Сайёра Эргашалиева ҳам 23 январь куни ўша уйда тиғли жисм билан ўлдирилгани, жасади эса бўлакланиб, Истанбулнинг турли туманларидаги чиқинди контейнерларига ташлаб кетилгани аниқланди. 

“23 январь куни тушдан кейин Дилшод билан Оқсаройда учрашдик. Кечки соат 21:00 гача бирга эдик. Дурдона ва Сайёранинг иккаласини ҳам ўлдиришни режа қилдик. Бу ишни ор-номус масаласи деб билдик. Менинг оиламни Сайёра, Дилшоднинг оиласини эса Дурдона барбод қилганди. Ўша куни кечқурун Дурдона ва Сайёрани уйга олиб келмоқчи бўлдик. Аммо қанча қистовга олсак ҳам Дурдона уйга келишни хоҳламади. Ўша кеча Дилшод билан Еникапидан метрога тушиб, Умронияга бордик. Умронияда биз турадиган уйга кетаётганимизда Қурбонали билан кўришиб қолдик. Қурбонали уйнинг бир хонасига бошқа ижарачи қўймоқчи эканини айтди. Мен унга ижарачи қўйма, ўша хонанинг ҳам пулини мен бераман, дедим. Лекин у рози бўлмади. Биз Қурбонали билан гаплашаётганимизда Дилшод биздан 30-40 метр нарида турарди. Қурбонали менга хонани ижарага берадиган аёлни олиб келишини, сўз берганини ва албатта олиб келишини айтди. Қурбонали аёлни олиб келиш учун кетди, биз эса Дилшод билан ўзимиз турадиган уйга бордик. Калит билан очиб, уйга кирдик. Ичкарида фақат Сайёра бор эди. Ундан бошқа ҳеч ким йўқ эди. Уйга киришим биланоқ Сайёрага сен нега онамни ҳақорат қилдинг, дедим. У “мен унақа демадим”, дейиши билан оғзига бир урдим. Сайёра бақир-чақир қила бошлади. Биз шундоқ ҳам Дилшод билан уни ўлдиришни режалаштириб қўйгандик. Шу пайт онамга қўнғироқ қилдим. Лекин онам гўшакни кўтармади. У телефонни кўтармагач, шовқин кучая бошлади. Дилшодга ишора қилдим. Режамиз пишиқ эди, бу воқеалар содир бўлаётганда менинг хонамда эдик. Мен Дилшодга ишора қилганимдан сўнг, Дилшод пичоқ билан 4 ёки 5 марта Сайёранинг юрагига урди. Сайёра кроватга йиқилди ва бир дақиқа ичида жон берди”, дейди гумонланувчи Ғофуржон Камолхўжаев. 

Кейинроқ, Дилшод ва Ғофуржон ердаги гиламни кўтариб, қора рангли ахлат халтасини очиб, кроватда ётган Сайёрани чойшаби билан бирга олиб, ерга солинган халта устига қўйган. Бу орада улар қотиллик далилларини қандай йўқ қилиш устида бош қотираркан, эшик тақиллаб, уй эгаси ёнида бир аёл билан келиб қолади. 

“Қурбонали билан бир аёл уйга кириб келди. Уларга эшикни мен очдим. Қурбонали Дилшоднинг уйда эканини билмасди. Қурбонали Дилшодни ҳам, ерда жасади ётган Сайёрани ҳам кўрмай, ўз хонасига кириб кетди. Ёнидаги аёл эса бурчакдаги бўш хонага ўтди. Орадан беш дақиқа ўтгач, Қурбонали хонасидан чиқиб, аёл кирган хонага ўтди. Биз уларнинг ухлаб қолишларини, овозлари ўчишини кутдик. Дилшод билан Сайёранинг жасадини ташлаб кетмоқчи эдик. Аммо биз чиқиб кетсак, уйдаги ўша нотаниш аёл жасадни кўриб қолади деб кетмадик ва Сайёранинг жасадини бўлакларга бўлиб, халталаб, ташқарига чиқариб ташлашни ўйладик. Дилшод Сайёранинг жасадини бўлакларга ажрата бошлади. Уйдан 4 та алоҳида ахлат халтаси билан чиқдик ва бу халталарни уй яқинидаги ахлат контейнерига ташладик. Жамадон ёки сумка қидириб чиқдик, лекин топа олмадик. Сўнг уйга қайтдик, ярим соатча ўтиргач, яна жамадон қидиргани чиқдик. Яна қўлимизга сиғадиган 3 та кичик халта олиб, уйдан чиқардик ва яқин атрофдаги ахлатга ташладик. Кейин бир дўкондан жамадон сотиб олиб, уйга қайтдик. Уйда фақат Сайёранинг гавдаси қолганди, уни жамадонга жойлаштирдик. Бутун уйни тозалаб бўлгач, яна кўчага чиқдик. Уй ёнидан ўтаётган таксини тўхтатиб, Лалели томонларга кетдик. Таксидан тушгач, Оқсарой тарафларда кўрган бир ахлат контейнерига Сайёранинг қолган гавдасини ташлаб, жамадонни яна ўзимиз билан олдик. Сайёранинг телефонини жасад билан бирга ташламаган эдик, уйда қолдирдик. Уйда эканлигимда Сайёранинг телефонидан гўёки Сайёранинг ўзидек бўлиб Дурдонага хабар ёздим. Хабарда “Ғофуржондан жуда тўйдим, ажрашмоқчиман, Ўзбекистонга кетаман”, деб ёздим. Оқсаройда ресторанда овқатланаётганимизда Дурдонага ўз телефонимдан қўнғироқ қилдим, у ҳали тўлиқ уйғонмаган экан. Дурдонага “ёнимизга кел, Сайёранинг бола-чақасига бир нарсалар оламиз, кейин уни кузатиб қўямиз”, дедик, шу сабабли ҳам жамадонни ёнимизда олиб юргандик. Дурдона “бир соатдан кейин Еникапида учрашайлик”, деди. Унинг келишини кутаётиб, Лалели тарафга ўтдик ва мен ўз телефонимни сотдим. Дилшодга 10 минг лира пул бердим, шундан сўнг Дилшод билан ажралдик”, дейди Ғофурфон Камолхўжаев.

Албатта, савол туғилади. Қотилликни амалга оширган иккиовлон бир-бири билан қандай таниш бўлган, уларни нима боғлаган? Дилшод Турдимуротовнинг кўрсатмаларига қараганда, у Ғофуржон Камолхўжаев билан ижтимоий тармоқдаги ўзбеклар канали орқали савдо-сотиқ қилиш мақсадида танишган. Улар атир ва кийим-кечак сотган. Дилшод Ғофуржондан олган кийимларининг устига фойда қўйиб сотган. Дилшод Турдимуротов сўзида давом этаркан, Туркияга Дурдона Ҳакимова билан яшаш мақсадида келгани, улар ўртасида ишқий муносабат бўлганини қўшимча қилган. 

“Дурдона билан бирга яшаш учун Истанбулга келдим. Ғофуржон Камолхўжаев билан савдо-сотиқ қилиш мақсадида танишган эдик. Мен Ғофуржон олиб келган кийимларни устига фойда қўйиб сотардим. Бу одамлар билан учрашганимиздан 3-4 кун ўтгач, яна Оқсаройда учрашдик. Бу сафар бир йилдан бери таниш бўлган шаръий никоҳимдаги аёлим Дурдона билан бирга бордим. Бу учрашувдан яна 3-4 кун ўтиб, Ғофуржон билан Сайёра бизни ўзбекча палов қилиш учун Ғофуржоннинг уйига таклиф қилишди. Шу тариқа улар билан яқинлик пайдо бўлди”, дейди Турдимуротов. 

Дилшод ва Ғофуржон 2026 йилнинг 23 январи, яъни Сайёра Эргашалиева ўлдирилган куни Истанбулнинг Оқсарой мавзесида кўришиб, кечгача бирга вақт ўтказган. Унинг айтишича, Сайёра Эргашалиевани Ғофуржон ўлдирган ва у воқеадан кейин хабар топган. 

“Фақат иккимиз айландик. Ёнимизда бошқа ҳеч ким йўқ эди. Еникапидан метрога ўтириб, Умронияга бордик. Шундан сўнг Ғофуржон менга “Сен шу ерда кутиб тур, уйга бошқа бировни олиб келибди, деб ўйламасин, мен Қурбонали билан кўришиб қайтаман”, деди. Қурбонали Умрониядаги қассоб дўконида ишлайди. Ғофуржон Қурбонали билан кўришганидан 15-20 дақиқа ўтиб ёнимга келди. У ердан Ғофуржон яшайдиган уйга пиёда бордик. Аниқ соати эсимда йўқ, лекин кечки соат 20:00-21:00 оралиғи эди. Уйга борганимизда эшикни Сайёра очди. Уйда Сайёрадан бошқа ҳеч ким йўқ эди. Сўнг мен, Ғофуржон ва Сайёра ошхонада чой ичдик. Кейин Ғофуржон билан Сайёра ўзлари яшайдиган хонага ўтишди. Бу хона квартира эшигидан кирганда ўнг томонда, рўпарада жойлашган. Ошхонада турганимда Ғофуржон билан Сайёранинг бақир-чақирини эшитдим. Тахминан ярим соатдан сўнг Ғофуржон мени хонага чақирди. Хонага кирганимда Сайёра крават устида қонга беланган ҳолда ётарди, Ғофуржоннинг қўлида эса пичоқ бор эди”, дейди Дилшод Турдимуротов.

Дилшод Турдимуротов сўзларида давом этаркан, қонга беланганча хушсиз ҳолда ётган Сайёранинг устида либоси бўлгани учун унинг қеридан пичоқланганини билмаганини айтган. Хуллас, иккиовлон жиноят далилларини яшириш учун чойшабга ўраб, ерга ётқизган. Дилшод Турдимуротов Сайёранинг ўлигини кўрган, лекин унинг бўлакланганидан бехабар қолган. У ўша вақтда ухлаб қолгани, уйғонганида эса чиқинди халтларида Сайёранинг жасади бўлакларини  кўргани, уларни Ғофуржон бўлаклаганини айтган. 

“Кечқурун уйга киришдан олдин Ғофуржон менга ярми қизил, ярми оқ бешта таблетка берди. Мен бу таблеткалар нима эканлигини билмайман. Сайёрани краватдан чойшаби билан бирга ерга туширганимиздан кейин уйқум келди ва хона бурчагидаги диванда ухлаб қолибман. Эрталаб соат 09:00-10:00 лар атрофида уйғониб, ўзимга келганимда, хонада 4-5 тадан кўп қора чиқинди халтаси бор эди. Бу халталарни очиб қараганимда, бир халтанинг ичида фақат Сайёранинг танаси бор эди. Бошқа халталарда Сайёранинг бошқа аъзолари бор эди ва бу халталар қон бўлгани учун танасининг қайси қисмлари эканлигига унча эътибор бермадим. Воқеа содир бўлган кечаси Ғофуржон иккимиз уйга келганимиздан кейин, биздан сўнг уйга кимдир келган-келмаганини билмайман. Эрталаб Ғофуржон менга Қурбоналининг бир аёл билан уйга келганини айтди. Эрталаб уйғонганимда мен Қурбонали ва унинг ёнидаги аёлни кўрмадим. Эрталаб уйғонгач, Ғофуржон иккимиз қонли чойшаб ва латталарни халталарга солиб, уй ёнидаги ахлат қутисига ташладик. Буларни ахлатга ташлаганимиздан сўнг Ғофуржон бориб, крем рангли бир жамадон олиб келди. Сайёранинг танаси бўлган қисмни чойшабга ўраб, қора халталарга солиб, жамадоннинг ичига жойлаштирдик. Сўнгра эшик олдига чиқиб, ўша ердан таксига ўтирдик”, дейди у. 

Турдимуротовнинг айтишича, Сайёра вафотидан тахминан 10-12 кун олдин Ғофуржон билан бирга бир кекса одамга турмушга чиққан ёш келинчакнинг уйига меҳмонга борган ва ўша ерда Сайёра келинчакка қараб, “менга ҳам шундай бой ва кекса турмуш ўртоқ топиб бер”, деб айтган. Бу гаплар Дурдона Ҳакимова орқали Ғофуржоннинг қулоғига етиб келган. Сайёра эса Ғофуржоннинг онасини ҳақорат қилган. Булардан ғазабланган Ғофуржон Камолхўжаев эса Сайёрани ўлдиришни ният қилиб, бу масалада Дилшод Турдимуротов билан маслаҳатлашган. Турдимуротов эса ўз баёнотида уни бу ишдан қайтаришга уринганини билдирган. 

“Сайёра Ғофуржондан тинмай пул сўрарди. Улар қаттиқ баҳслашишарди. Лекин нима учун жанжаллашаётганларини билмайман. Ғофуржон Сайёрани нима учун ўлдирганини ҳам билмайман. Мен Қурбоналини ўша кеча кўрмадим. Мен гиёҳванд модда таъсирида эдим. Эрталаб уйғонганимда жасадлар парчаланиб кетган эди. Мен Қурбонали мурдани бўлаклаган ё бўлакламаганини билмайман. Ғофуржон бир ўзи эрталабгача бўлаклаган бўлиши мумкин. Ўзбекистон аҳолисининг 90 фоизи болалигидан қассоблик билан шуғулланади ва сўйиш, бўлаклаш бўйича ҳам маълумотга эга. Мен Сайёрани ўлдирмаганман. Мен унинг жасадини бўлакларга ажратмадим. Содир бўлган қотилликдан қўрққаним ва ўша пайтда миям ишламагани учун хабар бера олмадим. Нима учун Ғофуржонга жасадни ташишда ёрдам берганимни билмайман”, дейди Дилшод Турдимуротов. 

Прокуратура икки гумонланувчига нисбатан “қасддан ваҳшийларча ўлдириш ёки қийноққа солиш” айби бўйича оғирлаштирилган умрбод қамоқ жазоси, “одамнинг ўлимидан фойдаланиб ўғирлик қилиш” айби бўйича эса 5 йилдан 10 йилгача қамоқ жазосини талаб қилди. Ҳозирча суд ушбу талаб бўйича ҳукм чиқарганича йўқ. 

Сайёранинг вафоти 

Жорий йилнинг 24 январь куни Истанбулнинг Шишли тумани Куюлубоғ кўчасидаги чиқинди қутисидан 37 яшар ўзбекистонлик Дурдона Ҳакимованинг бўлакланган жасади топилди. 

Камера ёзувлари ва гувоҳларнинг кўрсатмаларига кўра, ҳодиса жойидаги ахлат контейнерига қорамтир кийимдаги, соқолли икки эркак оч рангли жамадон билан келгани, кейин яна жамадон билан пиёда кўчадан чиқиб кетгани, гумонланувчилар жамадонни ҳодиса жойига яқин бўлган Бозкурт кўчаси томон ташлаб кетгани аниқланган.

Истанбул полицияси Истанбул аэропортида Грузияга қочмоқчи бўлган пайтда икки нафар қотилликда гумонланувчини қўлга олган. Уларнинг иккаласи ҳам Ўзбекистон фуқаролари экани маълум бўлган. Разведка бўлими ва Қотиллик бўлими томонидан бир неча соат ичида ушланган гумонланувчилардан бири қотилликни бевосита содир этган, иккинчиси эса ёрдам бергани аниқланган. Шунингдек, гумонланувчилар фойдаланган таксини бошқарган шахс ҳам қўлга олинган. Шу тариқа иш бўйича ҳибсга олинганлар сони 3 нафарга етган.

Февраль  ойига келиб, мазкур иш доирасида олиб борилган суриштирувлар натижасида Дурдона Ҳакимова ўлдирилган Умрониядаги уйда яна бир ўзбекистонлик аёл – Сайёра Эргашалиева ҳам бўлаклаб ўлдирилгани аниқланди.

Туркия ҳуқуқни муҳофаза қилувчи органларидан олинган дастлабки маълумотларга кўра, аввал Дурдона Ҳакимованинг ўлими билан боғлиқ ҳодисадан сўнг бедарак йўқолган деб топилган фуқаро 1994 йилда Наманган вилоятида туғилган Сайёра Эргашалиеванинг айнан Дурдона Ҳкамиова қотиллигида гумонланаётган шахслар томонидан ўлдирилгани аниқланган. Сайёра Эргашалиева Дурдона Ҳакимованинг яқин дугонаси бўлган. 

23 январь куни гумонланувчилар Дилшод Турдимуротов ва Ғофуржон Камолхўжаев ўзаро тил бириктирган ва Эргашалиевани аввал пичоқ билан ўлдириб, жасадни бўлаклаб, Фотиҳ туманидаги ахлат қутиларига ташлаган. 24 январь куни қотиллар Эргашалиеванинг телефонидан Ҳакимовага SMS хабар юбориб, уни ҳам чақириб, Эргашалиева сингари уни ҳам пичоқ билан ўлдириб, танани бир нечта қисмларга бўлиб, Шишли туманидаги чиқинди қутиларига ташлаган.

Ҳозиргача Эргашалиеванинг жасади топилмаган.