“Сарсон кубок”. Чемпионлик Сенегалга қайтарилиши мумкин

Аввалроқ, Африка кубоги чемпионлигидан маҳрум қилинган Сенегал ҳолат юзасидан Спорт арбитраж судига (CAS) шикоят йўллаган эди. CAS ҳаками Раймонд Хак Африка футбол конфедерацияси Апелляция кенгашининг қарори устидан берилган апелляция Сенегал фойдасига ҳал бўлишини кутаётганини маълум қилди. Бу ҳақда у ESPN нашрига берган интервьюсида маълум қилди.

Раймонд Хакнинг айтишича, Марокаш томони ўйин якунига қадар расмий норозилик билдирмаган. Унинг фикрича, бош ҳакам Жан-Жак Ндала ўйинни давом эттиришга қарор қилган экан, якуний натижани бекор қилиш учун ҳуқуқий асос йўқ.

“Йўқ, умуман йўқ. Ўйиннинг якуний қарорини ҳакам қабул қилади. У ҳуштак чалиб ўйинни тугатганидан сўнг натижа ўзгармайди”, дейди Хак.

Унинг таъкидлашича, агар Марокаш қўшимча вақтни расмий норозилик остида ўйнаганини билдирганида, вазият бошқача бўлиши мумкин эди. Аммо бундай ҳолат кузатилмаган ва жамоалар тўлиқ 30 дақиқа қўшимча вақтни ўйнаган.

Мутахассис, шунингдек, Африка футбол конфедерацияси Апелляция кенгаши Марокашга 3:0 ҳисобида техник ғалаба беришда регламентнинг 84-моддасини нотўғри қўллаганини айтди. Унинг тушунтиришича, бу модда фақат 82 ва 83-моддалар биргаликда бузилганда қўлланилиши мумкин.

82-модда жамоанинг ўйинни тарк этиши ёки давом эттиришдан бош тортишини назарда тутади. 83-модда эса жамоанинг белгиланган вақтда майдонга чиқмаслиги билан боғлиқ. Хакнинг фикрича, Сенегал 82-модда бўйича баҳоланиши мумкин, аммо 83-модда бузилмаган.

“84-модда жуда аниқ ёзилган: у 82- ва 83-моддалар бузилганда қўлланади. Бу ерда эса 83-модда бузилмаган. Шунинг учун Марокаш ғолиб деб эълон қилинмайди”, дейди у.

Хакнинг қўшимча қилишича, Спорт арбитраж суди якуний қарор чиқармагунча Сенегал медаллар ва мукофот пулларидан маҳрум қилинмаслиги керак. Унинг фикрича, бу жараён камида олти ой давом этади.

“Бу масала ҳал бўлмагунча ҳеч нарса ўз кучини йўқотмайди. Ўйинчилардан медалларни ёки мукофот пулларини қайтаришни талаб қилиб бўлмайди. Якуний қарор суд томонидан қабул қилинади”, дейди у.

Мутахассис якунда бу можаро Африка футболи обрўсига салбий таъсир кўрсатиши мумкинлигини ҳам таъкидлаган.

Эслатиб ўтамиз, кеча, 18 март куни Африка футбол конфедерацияси баёнот бериб, Апелляция кенгаши Сенегалнинг жорий йилнинг январь ойида Марокаш устидан қозонган 1:0 ҳисобидаги Африка кубоги финалидаги ғалабасини бекор қилганини билдирганди. Бунга сабаб сифатида Сенегал футболчиларининг ҳакам қарорларига норозилик билдириб, бир муддат майдонни тарк этгани келтирилган.