Самарқандда ахлат челагига ташлаб кетилган чақалоқнинг онаси топилди

Аввалроқ, Самарқанд вилоятининг Пайариқ туманида аёл туғуруқхонада чақалоғини дунёга келтириб, ахлат челагига ташлаб кетгани ҳақида хабар берилганди. Ушбу чақалоқнинг онаси топилди. Бу ҳақда вилоят Ички ишлар бошқармаси матбуот хизмати QALAMPIR.UZ сўровига асосан хабар берди. 

Бошқармага кўра, ҳолат ўтган йилнинг 27 декабрь куни Пайариқ туманидаги туғуруқхонада содир бўлган. Чақалоқ топилгач, унинг нафас олмаётгани ва ўлик ҳолда экани аниқланган, лекин у онаси томонидан ўлдирилганми ёки йўқ, бу ҳозирча номаълум. 

ИИБга кўра, айни пайтда ҳолат бўйича экспертиза тайинланган ва натижалар эълон қилингач, боланинг тирик туғилгани ёки она қорнида нобуд бўлиб кейин туғилгани маълум бўлади. 

Дастлабки маълумотларга кўра, топилган чақалоқ ўз вақтида туғилган, тўққиз ойлик, ўғил бола бўлган.

“Натижалар эълон қилинмагани учун айни дамда аёл процессуал тартибда қўлга олинмаган. Унга нисбатан жиноят иши қўзғатиш ва қўлга олиш масаласи ҳам ушбу экспертиза хулосасидан кейин амалга оширилади”, деди вилоят ИИБ ахборот хизмати вакили. 

QALAMPIR.UZ ҳолатга янада аниқлик киритиш мақсадида Соғлиқни сақлаш вазирлиги матбуот котиби Фурқат Санаев билан ҳам боғланди. ССВ вакили бу воқеа бўйича ҳеч қандай маълумот тақдим эта олмаслиги, прокуратура иш бўйича ўрганиш олиб бораётгани ва бунда шифокорларнинг ҳеч қандай айби йўқлигини айтди.

Zamon.uz хабарига кўра, 4 ой олдин турмушга чиққан келин 27 декабрь куни туғуруқхонага қайнонаси билан бирга боргани, у овқат ҳазм қилиш билан боғлиқ муаммолардан шикоят қилгани, шу билан бирга тўлиқ тиббий кўрикдан ўтишдан қатъиян бош тортган. Беморнинг ҳаракатлари шифокорни хавотирга солиб, уни ультратовуш текширувига юборган, бироқ аёл бу текширувдан ҳам бош тортган.

Шундан сўнг, бемор ҳамшира ҳамроҳлигида муолажа хонасига юборилган. Аёл у ерда ўзини ёлғиз қолдиришларини сўраган. Бироз вақт ўтгач, ходимлар ахлат челагида янги туғилган чақалоқ жасадини топган.

Беморнинг шахси видеокузатув камералари ёрдамида зудлик билан аниқланган. Дастлаб у бунга алоқадорлигини рад этган, бироқ кейинги тиббий текширувлар туғруқ фактини тасдиқлаган.

Эслатиб ўтамиз, аввалроқ Фарғона нефтни қайта ишлаш заводи ҳудудида жойлашган 12-сонли ишлаб чиқариш цехининг ер майдонига тахминан 3-6 ойлик бўлган ҳомила кўмиб кетилгани ҳақида хабар берилганди.