Самарқандда 1 ойда 100 ўринли шифохона ва 1000 ўринли карантин комплекси қурилади

Жамият

image

Самарқанд шаҳрида жойлашган ҳарбий қисмнинг бўш турган 18 гектар ер майдонида 100 ўринли замонавий шифохона мажмуаси қурилиши бошланди. Бу ҳақда УзА хабар берди.

Қайд этилишича, турли хасталиклар, жумладан юқумли касалликларга чалинган беморларни даволашга мўлжалланган шифо маскани бугунги кун талаблари асосида бунёд этилиши, даволаш ва реанимация бўлимлари ташкил этилиши кўзда тутилган. Шунингдек, бу ерда тиббиёт ходимлари учун турар жойлар қурилади.

Бош пудратчиси "Бунёдкор обод Пастдарғом" давлат унитар корхонаси бўлган мажмуани бир ой давомида қуриб, фойдаланишга топшириш режалаштирилган. Шунингдек, мазкур ҳудудга туташ ҳарбий шаҳарчадаги 9 гектар майдонда 1000 ўринли карантин комплекси қурилиши бошланди.

Айни пайтда бу ерга "Ўзавтосаноат" акциядорлик жамияти томонидан контейнерлар келтирилмоқда. Соғлиқни сақлаш вазирлиги эса мажмуа учун зарур тиббий ускуналар, диагностика ва даволаш жиҳозлари етказиб бермоқда.

Самарқанд вилояти ҳокимлиги ахборот хизматининг хабарига кўра, вилоят ҳокими Эркинжон Турдимов Республика қурилиш вазирлиги масъуллари билан бирга мазкур объект лойиҳаси ва қурилиш жараёнлари билан танишди. Қурилишни сифатли, белгиланган меъёрларга тўла амал қилган ҳолда амалга ошириш юзасидан топшириқ ва тавсиялар берилди.

Мазкур тиббий муассасалар келгусида Ўзбекистон Мудофаа вазирлиги тасарруфига ўтказилиши белгиланган.


Мақола муаллифи

Теглар

Самарқанд Шифохона

Баҳолаганлар

54

Рейтинг

2.9

Мақолага баҳо беринг

Дўстларингиз билан улашинг