“Салимбойвачча”нинг ўғли ва ишчилари ҳам ИИББга олиб кетилган – манба

Аввалроқ, Тошкентда криминоген вазиятни яхшилаш, жиноятларнинг олдини олиш ва ҳуқуқбузарликлар профилактикасини кучайтириш мақсадида ўтказилган тадбирлар давомида Ўзбекистон Миллий Олимпия қўмитаси раисининг ўринбосари, Спорт курашлари ассоциацияси раиси Салим Абдувалиев (“Салимбойвачча”) ҳуқуқ-тартибот органлари томонидан қўлга олингани ҳақида хабар берган эдик. Салим Абдувалиевни уйдан олиб чиқиб кетилган куни тинтув ўтказилиб, унинг хонадонидан қуроллар билан бирга қимматбаҳо соатлар ҳам олинган. Бу ҳақда QALAMPIR.UZ манбаси маълум қилди.

“Салим Абдувалиев уйдан олиб чиқиб кетилган куни уйидан қуроллар билан бирга қимматбаҳо соатлар ҳам олинган. Бошқа ҳеч нарса олинмаган”, дейди манба. 

Шунингдек, шу куннинг ўзида унинг уйида бўлган яқинлари, ишчилари ва ўғли – жами 20 дан ортиқ одам сўроқ қилиш учун Тошкент шаҳар Ички ишлар бош бошқармасига олиб борилган. 

Сўроқда улардан қурол кимга тегишлилиги сўралган. Савол-жавоб тугагач, улар уйларига қўйиб юборилган.

Эслатиб ўтамиз, Тошкент шаҳар Ички ишлар бош бошқармаси Тошкент шаҳрида криминоген вазиятни яхшилаш бўйича кенг қамровли тезкор-профилактик тадбирлар ўтказилаётганини маълум қилган эди. Тадбир давомида Салим Абдувалиев Тошкентнинг Файзобод даҳасида жойлашган уйида қўлга олинганди. 

Тошкент шаҳар ИИББ бошлиғининг биринчи ўринбосари Дониёр Тошхўжаевга кўра, Салим Абдувалиевнинг ноқонуний қурол сақлаётгани аниқланган. Унга нисбатан Жиноят кодексининг 248-моддаси билан иш қўзғатилган ва қамоққа олиш эҳтиёт чораси танланган. Ҳозирда дастлабки тергов олиб борилмоқда.