“Салимбойвачча” Қирғизистон жанубини тўлиқ назорат қилган – Ташиев (видео)

north_east

Қамоққа тушгани ҳатто АҚШни қувонтирган “Коля Қирғиз” ким эди?

Халқ орасида "Салимбойвачча" номи билан машҳур Салим Абдувалиев қўшни Қирғизистоннинг жанубини бутунлай назорат қилган. Бу ҳақда Қирғизистонда Миллий хавфсизлик қўмитаси раиси Қамчибек Ташиев кеча, 16 январь куни Таълим ва фан вазири ўринбосарлари, олий ўқув юртлари ректорлари, касб-ҳунар лицей ва коллежлари директорлари билан учрашувда сўз очди.

"Мамлакатимиз бошқа давлатлардаги уюшган жиноятчиликнинг раҳбарлари остида эгила бошлаганди. Мана, Ўзбекистондаги "Салимбайвачча". У мамлакатимиз жанубини тўлиқ назорат қилган. Жанубда барча уюшган жиноятчилик раҳбарлари, барча йирик тадбиркорлар ва ҳатто баъзи сиёсий арбоблар, парламент аъзолари унинг олдига бориб, у билан гаплашган ва у нима деса, шуни қилишган. Тушуняпсизми? Энди бу содир бўлмайди. Мамлакатимиз мустақил ривожланади. Уюшган жиноятчилик бўлмайди", деди Ташиев.

Шунингдек, у бир неча йил олдин Қирғизистонда уюшган жиноятчилик жуда жиддий бўлгани, бутун мамлакат бўйлаб "қонундаги ўғрилар" ва "положенец" назоратчилар ҳокимиятни эгаллаб олганини айтди ва  халқаро жиноий доираларда “Коля қирғиз” номи билан танилган криминал авторитет Қамчи Кўлбоев 2023 йилда ҳибсга олиниши чоғида ўлдирилганининг сабабини тушунтирди. 

"Уларда давлат тизимига ўхшаш тизим бор эди: уларда "қонундаги ўғри" бўлган "президент" бор эди, қолган вилоятлар, туманлар ва шаҳарлар ҳам шундай эди. Назоратчилар ва “Смотрящи”лар тадбиркорлардан ҳам, ҳаммадан ҳам пул йиғишди. Уларнинг ўзига хос, жуда кучли тузилиши бор эди. Чоралар кўришга мажбур бўлдик. Сизларга кўпроқ маълумот бераман, токи ишончингиз комил бўлсин, азиз таълим соҳаси ходимлари. Мен ҳақиқатни айтмоқчиман: "қонундаги ўғрилар"ни йўқ қилиш учун қарор қабул қилишим керак эди. Давлат манфаати учун мен буни қабул қилдим ва биз уни йўқ қилдик. Кейинчалик биз унинг шериклари ва уюшган жиноятчиликнинг бошқа аъзоларини йўқ қилдик. Бугун мамлакат бу тартибсизликдан озод; Мамлакатда уюшган жиноятчилик мавжуд эмас. Бу Марказий Осиёда ва эҳтимол нафақат Марказий Осиёда, балки бутун собиқ Совет давлатлари орасида ҳозирда уюшган жиноятчиликка учрамаган ягона давлатдир", деди Ташиев.

Маълумот учун, Жиноят оламида “Коля Қирғиз” номи билан танилган қирғизистонлик таниқли криминал авторитет Қамчибек Кўлбоев (Қамчибек Асанбек улуу Кўлбоев) 2023 йил 4 октябрь куни Бишкекда Миллий хавфсизлик ходимлари томонидан ўтказилган махсус операция вақтида ҳалок бўлган. Узоқ йиллик “жиноий карьера”га эга бўлган “қонундаги ўғри” (“вор в законе”) 49 ёшида хавфсизлик ходимининг ўқидан ўлган.