Саида Мирзиёева Арқадағда “Арқадағ”нинг қизи билан учрашди

Ўзбекистон Президенти Шавкат Мирзиёевнинг тўнғич қизи – Президент ёрдамчиси Саида Мирзиёева бугун, 29 март куни Туркманистоннинг Арқадағ шаҳрида Туркман халқининг миллий етакчиси, Туркманистон Халқ Маслаҳати Раиси Гурбангули Бердимуҳамедовнинг тўнғич қизи, Гурбангули Бердимуҳамедов номидаги Қаровга муҳтож болаларга кўмаклашиш хайрия жамғармасининг тиббий фаолият бўйича вице-президенти Огулжаҳон Отабоева билан учрашди. Бу ҳақда Саида Мирзиёева ўзининг ижтимоий тармоқлардаги саҳифасида маълум қилди.

“Бугун Огулжаҳон Гурбангулиевна Отабоева хонимнинг таклифларига биноан Туркманистонда ташкил этилган “Тинчлик ва ишонч йили: болалар учун халқаро фаолиятни ривожлантириш” номли халқаро конференцияда қатнашиш шарафига муяссар бўлдим.

Халқларимизни нафақат қўшничилик, балки асрлар давомида шаклланган қон-қардошлик алоқалари, умумий маданият ва буюк тарих боғлаб туради”, деб ёзди Мирзиёева. 

Президент ёрдамчиси Гурбангули Бердимуҳамедов номидаги хайрия жамғармасининг фаолияти унда катта таассурот қолдиргани, бу болаларга ғамхўрлик, масъулият ва самимий муҳаббатнинг ёрқин намунаси эканини қўшимча қилди.

“Ишончим комилки, бугунги форум келажак авлодлар манфаати учун ҳамжиҳатликда ишлаш, тажриба алмашиш ва ўзаро самарали алоқалар учун янги имкониятлар очади. Биз ҳамкорликка доим тайёрмиз ва биргаликда фарзандларимиз учун бундан ҳам кўпроқ ишларни қила олишимизга ишончимиз комил. Чунки уларнинг бахти — бизнинг умумий келажагимиздир”, деди Саида Мирзиёева.

Саида Мирзиёева Огулжаҳон Отабоева билан алоҳида учрашув ҳам ўтказди ва унга Туркманистонга таклиф ва самимий, илиқ қабул учун чуқур миннатдорлик билдирди. 

“Ушбу ташриф муборак Рамазон ойида амалга ошгани ҳам рамзий маънога эга. Туркманистон халқини Рамазон ҳайити билан самимий муборакбод этаман ҳамда тинчлик, тараққиёт ва келажак авлод фаровонлиги йўлида янги ютуқлар тилайман”, деб ёзди Саида Мирзиёева.

Маълумот учун, бугун, 29 март куни Арқадағ шаҳрида Гурбангули Бердимуҳамедов номидаги Қаровга муҳтож болаларга ёрдам кўрсатиш бўйича хайрия жамғармаси ташкил этилганининг 4 йиллигига бағишланган “Тинчлик ва ишонч йили: болалар учун халқаро фаолиятни ривожлантириш” мавзусида халқаро конференция бўлиб ўтди. Унда Ўзбекистон, Туркия, Эрон, Россия, Қозоғистон, Хитой, Тожикистон, Беларусь, Қирғизистон, Ҳиндистон ва бошқа мамлакатларнинг давлат органлари ва жамоат ташкилотлари, халқаро ташкилотлар раҳбарлари ва вакиллари иштирок этди. Хусусан, Россия Федерацияси Федерация Кенгаши раиси ўринбосари Инна Святенко, Ўзбекистон Президентининг ёрдамчиси Саида Мирзиёева, Эрон Ислом Республикаси Йўллар ва шаҳарсозлик вазири Фарзана Малваджерд, Қозоғистон Соғлиқни сақлаш вазири Акмарал Алназарова, Грузия Меҳнат, соғлиқни сақлаш ва ижтимоий масалалар вазири Михаил Сарджвеладзе, Туркия Республикаси оила ва ижтимоий хизматлар вазири Моҳинур Гўктош, Арманистон Соғлиқни сақлаш вазирлиги бош котиби Вардануш Григорян ва Askin&Co Med-Lab компанияси бош директори Ральф Лугбауэр конференцияда қатнашди.

Тадбир доирасида Туркманистонда фаолият юритаётган хорижий дипломатик ваколатхоналар ва халқаро ташкилотлар ходимларининг фарзандлари учун ижодий танловлар ташкил этилди.

2021 йил март ойида ташкил этилган Хайрия жамғармаси шу каби профилдаги халқаро ташкилотлар билан ҳамкорликни фаол ривожлантирмоқда. Жамғарма ўз фаолияти давомида турли мамлакатлардаги табиий офатлардан жабр кўрган болаларга ёрдам кўрсатган, шунингдек, Туркманистондаги муҳтож болаларни даволаш билан шуғулланган.