Саакашвили Грузия расмийларини Украина ҳақида ёлғон маълумот тарқатишда айблади

Украина Адлия вазирлиги тўрт ой олдин Грузиянинг собиқ президенти Михаил Саакашвилини экстрадиция қилиш бўйича Тбилисига сўров юборган. Бу ҳақда Саакашвили ўзининг Facebook'даги саҳифасида ёзди.

“Украина Адлия вазирлиги мени экстрадиция қилиш жараёнини тўрт ой олдин бошлашни талаб қилган, кейин эса бу ҳужжатни менга Украина консули олиб келган”, дейилади Саакашвилининг Facebook'даги саҳифасида. 

Шунингдек, собиқ президент Грузия расмийларининг Тбилиси бундай сўров олмагани ҳақидаги баёнотларини ҳам ёлғон деб атаган.

Грузиянинг амалдаги Президенти Саломе Зурабишвили ҳам ўтган ойда “Украйинская правда” газетасига берган интервьюсида мамлакатга Саакашвилини экстрадиция қилиш бўйича сўров келиб тушмаганини айтган. Кеча, 4 июль куни Грузия Адлия вазири Рати Брегадзе ҳам буни тасдиқлаган.

Маълумот учун, Саакашвили 2013 йилда Грузияни тарк этган, шундан сўнг мамлакатда унга қарши тўртта жиноий иш очилган, шундан иккитасида сиёсатчи сиртдан уч ва олти йиллик қамоқ жазосига ҳукм қилинган. 2021 йил октябрт ойида Саакашвили Грузияга яширинча келганида ҳибсга олинган. 2022 йил май ойида соғлиғи ёмонлашгани сабабли у Тбилисидаги "Вивамед" хусусий клиникасига олиб ўтилган ва у шу кунгача ўша ерда қолмоқда. Грузия расмийлари Саакашвили қамоқдан чиқиш учун ўзини оғир аҳволда деб кўрсатмоқда, деб ҳисобламоқда.

Эслатиб ўтамиз, жорий йилнинг 3 июль куни Саакашвили Тбилиси шаҳар судининг 2007 йилдаги митингни тарқатиб юбориш иши бўйича йиғилишида шифохонадан видеоалоқа орқали иштирок этганди. Видеода собиқ президент озиб кетгани кўринади. Кейинроқ Украина Президенти Владимир Зеленский Ташқи ишлар вазирлигига Грузия элчисига қўнғироқ қилиб, Украина фуқаролигига эга бўлган Саакашвили масаласи бўйича маслаҳатлашиш учун 48 соат ичида мамлакатни тарк этиш ҳақида буйруқ беришни топширди. Грузия Ташқи ишлар вазирлиги Киев қарорини дипломатик муносабатларни кескинлаштириш, шунингдек, суверен давлатнинг ички ишларига аралашишнинг экстремал шакли деб атади.