Руминия Эндрю Тейтга жиддий айбловларни эълон қилди

Бугун, 4 сентябрь куни Руминия прокуратураси блогер Эндрю Тейтга расман айблов эълон қилди. Бу ҳақда “Reuters” хабар берди.  

Қайд этилишича, унга вояга етмаганлар контрабандаси, пул ювиш, вояга етмаган шахс билан жинсий алоқада бўлиш ва гувоҳларга босим ўтказиш айблари қўйилмоқда. Унинг укаси Тристан бу иш бўйича шерик сифатида ўтмоқда. Иккаласи ҳам собиқ кикбоксчилар бўлиб, АҚШ ва Буюк Британия фуқаролигига эга.

Ака-укаларга қарши параллель равишда икки мамлакатда тергов ҳаракатлари олиб борилмоқда. Руминиядаги тергов 2022 йилда, Тейтлар Бухарест яқинида аёлларни жинсий эксплуатация қилиш учун ёллашда гумонланиб, қўлга олинганида бошланган. Тергов бир неча йилга чўзилди ва процессуал муаммоларга дуч келди, 2025 йилда эса ака-укаларга мамлакатни тарк этишга рухсат берилди ва улар Флоридага учиб кетди. Британиядаги терговни қироллик прокуратура хизмати олиб бормоқда. Идора ака-укани 2010-2017 йилларда зўрлаш, одам савдоси ва болаларнинг ахлоқсиз суратларини тарқатишда айбламоқда ҳамда уларни топширишни талаб қилмоқда.

Ҳозирда Тейтлар Руминияда эмас. Жорий йилнинг июль ойида Буюк Британия ака-укаларни топширишни сўраганидан кейин улар Майамида қўлга олинган.

АҚШ Маршаллар хизмати Тейтларни махфийлаштирилган ордер асосида ҳибсга олган. Буюк Британия Қироллик прокуратура хизмати бирданига 59 та банд бўйича экстрадиция қилишни сўраган: 21 та айблов аввалроқ эълон қилинган, яна 38 таси ёзда қўшилган. Гап етти нафар эҳтимолий жабрланувчи ва тергов талқинига кўра 2010 йил июлидан 2017 йил августигача содир этилган жиноятлар ҳақида бормоқда.

Тейтларнинг иккаласи ҳам АҚШ ва Буюк Британия фуқаролигига эга бўлган собиқ кикбоксчилар. Эндрю Тейт аёлларни ёмон кўришга қаратилган (мизогиник) баёнотлари ва “анъанавий эркаклик” ғояларини тарғиб қилиши билан танилган. Унинг Twitter (X) ижтимоий тармоғида 10 миллиондан ортиқ обуначиси бор.

Эслатиб ўтамиз, жорий йилнинг апрелб ойи бошида Эндрю Тейт Тошкентга келганди ва тантанали кутиб олинган эди.