Россиянинг Украинадаги тасдиқланган йўқотишлари қарийб 100 мингга етди

2022 йилда Россиянинг Украинага кенг кўламли босқини бошлангандан бери ҳалок бўлган россиялик аскар ва зобитларнинг тасдиқланган сони 95 026 кишига етди. Фақатгина сўнгги бир ой ичида – 24 январдан 21 февралгача – бу рўйхат 5007 нафар ҳарбий билан тўлдирилди. Бу ҳақда ҳисоб-китобларга таяниб, BBC рус хизмати хабар берди.

Қайд этилишича, ҳалок бўлганларнинг йирик тоифаларидан бири – урушга тўғридан тўғри колониялардан жўнатилган маҳбуслар. Жами 16 171 нафар собиқ маҳбуснинг ўлими тасдиқланган. Аммо BBC журналистлари кўриб чиққан “Вагнер” хусусий ҳарбий компанияси ҳужжатларига кўра, маҳбуслар Россия армиясининг уруш давомида кўрган ҳақиқий йўқотишларининг учдан бир қисмини ташкил қилиши мумкин.

Бундан ташқари, журналистларнинг ҳисоб-китобларига кўра, ўзини ўзи мустақил деб эълон қилган ДХР ва ЛХР (Донетск ва Луганск) қуролли тузилмаларида сўнгги уч йил ичида 21 мингдан 23,5 минггача одам ҳалок бўлган бўлиши мумкин. Уларнинг аксарияти мажбуран сафарбар қилиниб, фронтга минимал тайёргарлик билан жўнатилган. Ушбу йўқотишларнинг кўпи урушнинг биринчи йилида кузатилган бўлиб, бу Россиянинг расмий ҳарбий бўлинмаларининг айнан шу даврдаги йўқотишлари билан (25 769 киши) тенг.

BBC таҳлилига кўра, Россия тарафида урушда ҳалок бўлган ҳар 10 кишидан 3 нафари маҳбус, яна 2 нафари эса ДХР ва ЛХР аҳолиси бўлган. Бу икки тоифа Россия жамиятининг фаол қисми бўлмаган.

Шу билан бирга, Россия армиясининг урушдаги реал йўқотишлари тасдиқланган маълумотлардан анча юқори бўлиш эҳтимоли бор. Тахминий ҳисоб-китобларга кўра, у 146 194 дан 211 169 кишигача бўлиши мумкин. ДХР ва ЛХР йўқотишлари ҳам қўшилганда, Россия томонидан ҳалок бўлганларнинг умумий сони 167 194 дан 234 669 кишигача етиши мумкин.

Пентагон маълумотларига кўра, 2023 йилнинг ноябрь ойига келиб Россиянинг умумий йўқотишлари 615 минг кишига етган: 115 минг киши ҳалок бўлган, 500 минг киши яраланган. Буюк Британия Мудофаа вазирлиги эса Россиянинг умумий йўқотишларини 610 минг киши деб баҳолаган: улардан 200 минг нафари ўлган, 400 минг нафари эса яраланган. “The Economist” нашрининг таъкидлашича, бу кўрсаткичлар Россиянинг 1945 йилдан кейинги барча ҳарбий можаролардаги йўқотишларидан юқори.

Эслатиб ўтамиз, аввалроқ Халқаро стратегик тадқиқотлар институти (IISS) томонидан тайёрланган йиллик “Military Balance” ҳисоботида 2024 йил охирига келиб, 376 минг россиялик Украина фронтида оғир жароҳатлар олиб, ногирон бўлиб қолгани хабар қилинганди. 

Росстат маълумотларига кўра, 2023 йилда (ҳозирча кейинги статистика эълон қилинмаган) Россияда ногиронлар сони 108 минг кишига кўпайган – бу 2005 йилдан бери рекорд даража. Ногиронлик пенсиясини олувчилар сони ҳам деярли шунча ортган. Бу 1990 йилларнинг охиридан бери энг юқори ўсиш. Ўша даврда Чеченистон уруши фахрийлари оммавий равишда статистика базасига киритилган. 2023 йил охирига келиб, реабилитация техник воситаларига муҳтож бўлган ногиронлар сони сўнгги 11 йилдаги энг юқори даражага етиб, 468 минг кишини ташкил этган. Уруш бошланганидан бери уларнинг сони 42 фоизга ошган.