Россиялик жангчилар UFC’дан четлатиладими? Дана Уайт жавоб берди

Россиянинг Украинага қилаётган тажовузи туфайли россиялик спортчилар азият чекишмоқда. Уларнинг халқаро мусобақаларда иштирок этишига чекловлар қўйилмоқда. ММА’нинг энг нуфузли промоушени ҳисобланадиган UFC ҳам россиялик жангчиларга нисбатан чекловлар қўйиши зарурлиги айтилмоқда.

UFC президенти Дана Уайтнинг айтишича, промоушен Украинадаги вазият туфайли рус жангчиларга тақиқ қўйилмаслиги учун барча имкониятларни ишга солмоқда.

“Биз россиялик жангчилар иштирокидаги жангларни давом эттириш учун кечаю кундуз ишлаяпмиз. Вазият оғир, лекин мен шоу давом этиши керак деб ўйлайман”, деган Уайт.

Россия спортига киритилган чекловлар 

Рус қўшинлари Украинага киргач, Халқаро дзюдо федерацияси (ХДФ) Россия Президенти Владимир Путинни ташкилот фахрий президенти ва элчиси мақомидан маҳрум қилди. 

Польша, Чехия ва Швеция футбол терма жамоаси Жаҳон чемпионатига саралаш доирасида Россия билан ўйинга боришдан бош тортди.

Европа футбол уюшмалари иттифоқи (UEFA) 2022 йилги Европа Чемпионлар лигаси финали Санкт-Петербург шаҳридан Парижга кўчирилганини маълум қилди.

FIFA  ҳамда UEFA Россия терма жамоалари ва клубларини барча футбол мусобақаларидан чиқариб ташлади.

Халқаро баскетбол федерацияси россиялик баскетболчилар ва расмий шахсларни ташкилот шафелигидаги барча мусобақаларда иштирок этишдан четлаштирди.

Дунёдаги энг йирик спорт кийимлари компанияси “Аdidas” Россия футбол жамоалари билан ҳамкорликни тўхтатганини маълум қилди. Шунингдек, Германиянинг "Шальке 04" клуби ва UEFA'нинг ўзи ҳам Россиянинг "Газпром" трансмиллий компанияси билан ҳамкорликни тўхтатди.

Маъруф Абдумаликов