Россиялик блогерлар қозоқ аёлларини ҳақорат қилгани учун қамалди 

Россиялик блогерлар видеода қозоқ аёлларини ҳақорат қилгани учун 15 суткага қамалди. Бу ҳақда Nur.kz хабар берди.

Маълум бўлишича, блогерларнинг видеоларидан бирида қозоқ аёллари ҳақида гап кетган. Видео канал аъзоларидан бирининг YouTube каналига жойлаштирилган. Видеода йигитлардан бири Ренат Пашаев қозоқ аёллари ҳақида ҳақоратли сўзлар айтган ва улар билан жинсий алоқада бўлишга тайёр эканлигини билдирган. Жонли эфирнинг бу қисми кейинчалик таҳрирланиб, ўчириб юборилган. Аммо видео фойдаланувчилар томонидан юклаб олинган ва турли ижтимоий медиа платформаларида тарқалиб, кескин эътирозларга сабаб бўлган.

Кўп вақт ўтмасдан блогерлар ижтимоий тармоқларда қўпол сўзлар айтиб, жамоат тартибини ва Қозоғистон Республикасининг амалдаги қонунчилигини бузган деб топилган. Материаллар Олмаота туманлараро маъмурий судига юборилган. Вазият кўриб чиқилгандан кейин суд иккала ҳуқуқбузарга ҳам 15 кунлик маъмурий қамоқ жазосини тайинлаган.

Бош прокурор ўринбосари Ғалимжан Койгелдиев брифингда бу мавзу ҳақида гапириб ўтган.

“Ҳа, уларга майда безорилик айблови қўйилди. 15 кунлик қамоқ. Бироқ, мен Ички ишлар вазирлиги 174-моддаси этник нафратни қўзғатиш бўйича тергов бошлаганини айтишим мумкин”, деган Койгелдиев. 

Эслатиб ўтамиз, аввалроқ Туркманистонда гўшт нархининг қиммат эканини танқид қилган Дидар исмли блогер бедарак йўқолган. Орадан бир неча кун ўтиб, айрим ижтимоий тармоқ фойдаланувчилари изоҳларда у полиция томонидан олиб кетилгач, вафот этгани ҳақида хабар берилганди.

Жавоҳир Алиқулов