Россияга яна 10 минг Шимолий Корея ҳарбийси юборилиши мумкин – Зеленский

Украина Президенти Владимир Зеленский Россия ҳудудида 8 мингдан ортиқ Шимолий Корея ҳарбийси борлигини ва яна мамлакат 10 минг нафарни юборишга тайёргарлик кўрилаётганини айтди. Бу ҳақда Зеленский кеча, 28 сентябрь куни ижтимоий тармоқдаги постида маълум қилди.

У Шимолий Корея ҳарбийларининг Россияга юборилиши бўйича “янги маълумотлар” олинганини қайд этган. Зеленскийнинг айтишича, ушбу ҳарбийлар Россияга юборилишидан олдин тайёргарликдан ўтиш учун сараланмоқда.

Зеленскийнинг янги баёноти Киев ва Сеул ўртасида Шимолий Кореянинг Украинада асирга олинган икки ҳарбийси Жанубий Кореяга топширилгани ҳақидаги маълумотлар ортидан янграган.

Сеул Зеленскийнинг ушбу маълумотни ошкор қилганидан афсус билдирган. Жанубий Корея томони ҳарбийларни топшириш масаласини махфий сақлаш бўйича келишув бўлганини таъкидлаган. Шунингдек, Сеул Украина Президенти девонининг бундай махфийлик келишуви бўлмагани ҳақидаги баёнотини ёлғон деб атаган.

Украина ва Жанубий Корея ҳисоб-китобларига кўра, Шимолий Корея 2024 йилдан бери Россиянинг Украинадаги урушида қўллаб-қувватлаш учун тахминан 14–15 минг нафар ҳарбийини юборган. Уларнинг аксарияти Украина армиясининг ҳужумини қайтаришда ёрдам бериш учун Курск вилоятига жойлаштирилган.

Шунингдек, Пхеньян Россияга миллионлаб артиллерия ва миномёт снарядлари, баллистик ракеталар, узоқ масофали артиллерия тизимлари ҳамда реактив залпли ўт очиш тизимларини етказиб берган.

Эслатиб ўтамиз, Украина Президенти жорий йилнинг август ойида Россияга Россия томонида жанг қилиш учун 50 минг нафаргача Шимолий Корея ҳарбийси юборилиши мумкинлигини айтган эди. Шунингдек, у Жанубий Кореяни Украинага ҳаво мудофааси соҳасида ёрдам беришга чақирган.

Жанубий Корея июль ойида Украинага 100 миллион долларлик ёрдам пакети ажратишини эълон қилган. Бироқ бу ёрдам таркибига ўлимга олиб келувчи қуроллар киритилмаган.