Россияда йил бошидан бери тўртинчи ҳарбий самолёт ҳалокатга учради

Россиянинг Липецк вилоятида МиГ-31 қирувчиси қўниш вақтида қулаб тушди. Бу ҳақда “Газета.ru” хабар берди.

Хабарга кўра, МиГ-31 қирувчи самолёти 9 октябрь куни кечқурун, маҳаллий вақт билан соат 19:20 да Липецк вилоятида қўниш чоғида ҳалокатга учраган. Маълум қилинишича, самолёт режалаштирилган ўқув-парвозини амалга ошираётган, бортида қурол-аслаҳа бўлмаган. У одам яшамайдиган ҳудудга қулаб тушган. Ерга урилишдан олдин экипаж катапульталанган. Мудофаа вазирлиги учувчиларнинг ҳаётига хавф йўқлигини тасдиқлаган.

ОАВ маълумотига кўра, самолёт қўниш пайтида шасси очиш тизимида носозлик юзага келган. Учувчи ва штурман самолётни тураржойлардан узоққа йўналтирган ва сўнг катапульталанган. Қўнгандан сўнг экипаж жароҳат олган ва шифохонага етказилган. Самолёт ўрмон ҳудудига қулаб тушиб, ёниб кетган.

МиГ-31 – икки ўриндиқли, узоқ масофали, ўта тезкор қирувчи-тутувчи бўлиб, у соатига 3 минг километр тезликка чиқиши ва 21 минг метр баландликка кўтарилиши мумкин.

Йил бошидан бери тўртинчи ҳалокат

МиГ-31 ҳалокати 2025 йил бошидан бери Россия ҳарбий-ҳаво кучларининг тўртинчи йўқотиши бўлди.
Жорий йилнинг июль ойида Нижний Новгород вилоятида Су-34 қирувчи-бомбардимончи самолёти қулаб тушган. У шассининг носозлиги сабабли қўнишга уринган, аммо муаммони бартараф эта олмаганидан сўнг экипаж катапульталанган.

Апрель ойида Иркутск вилоятида Ту-22M3 ракета ташувчи бомбардимончи ҳалокатга учраган. Самолёт режалаштирилган парвозни амалга ошираётган эди. Бир учувчи ҳалок бўлган, тўртта экипаж аъзоси омон қолган. Мудофаа вазирлиги сабабни техник носозлик деб атаган.

Яна бир ҳодиса март ойида Приморье ўлкасида юз берган. Ўшанда Су-25 штурм самолёти машғулот парвози чоғида қулаган. У ҳам одам яшамайдиган жойга тушган, учувчи катапульталанган.