Россияда ўзбекистонликлар яна ЙТҲ қурбони бўлди

Бугун, 16 январь куни тахминан соат 11:30 да Россиянинг Самара вилоятида ўзбекистонликлар бўлган автомашина ЙТҲга учради. Бу ҳақда вилоят прокуратураси маълум қилди.

“Ставрополь тумани, Большая Рязань қишлоғи яқинида М-5 Урал автомагистралининг 745-километрида иккита автомобиль иштирокида йўл-транспорт ҳодисаси содир бўлди. Дастлабки маълумотларга кўра,  Lada Largus ҳайдовчиси бошқарувни йўқотиб, қарама-қарши томонга чиқиб кетган ва у ерда юк машинаси билан тўқнашган”, дейилади расмий хабарда.

Маҳаллий нашрлардан бири эса ўз манбасига таяниб, автоҳалокатга учраган  Lada Largus автомобили ичида 7 нафар Ўзбекистон фуқароси бўлгани ва улардан 3 нафари ҳалок бўлганини хабар қилган. Билдирилишича, қолган 4 нафар ўзбекистонликлар шифохонага ётқизилган.

Эслатиб ўтамиз, 11 январь куни  Россиянинг Пенза вилоятидаги М-5 Урал трассасида юк машинаси ва микроавтобус иштирокида содир бўлган мудҳиш йўл-транспорт ҳодисаси оқибатида 7 нафар Ўзбекистон фуқароси воқеа жойида ҳалок бўлганди. Президентнинг топшириғи билан Пензада ҳалок бўлган ўзбекистонликларнинг жасадлари 13 январь куни Хоразм вилоятига олиб келинганди.