Россияда озарбайжонлик яна бир тадбиркор қўлга олинди (видео)

Россиянинг Санкт-Петербург шаҳрида қурилиш компаниясининг 32 ёшли бош директори Марк Александрович Амуров умумий қиймати 46 миллион рубль (7 миллиард 413 миллион 96 минг 278 сўм) дан ортиқ бўлган фирибгарликларда гумонланиб, қўлга олинди. Бу ҳақда мамлакат Ички ишлар вазирлигининг Санкт-Петербург ва Ленинград вилояти бўйича бошқармасига таяниб, РБК хабар берди.

Нашрга кўра, Жиноят кодексининг 159-моддаси (фирибгарлик) билан жиноят иши қўзғатилган.

Полиция маълумотларига кўра, гумонланувчи турар-жой бинолари қурилишига сармоя жалб қилиш ва кейинчалик уларни ижарага бериш баҳонасида ҳаракат қилиб, алдов йўли билан уч нафар санкт-петербургликнинг маблағларини ўзлаштирган. Гумонланувчи қўшни давлатлардан бирида туғилган.

Тадбиркор Парголово қишлоғининг Вологодская кўчасидаги шахсий уйида қўлга олинган. Тинтув чоғида хавфсизлик кучлари томонидан мулкка оид ҳужжатлар, уяли телефон ва пул (рубль ва хорижий валютада) олиб қўйилган.

“78.ru” порталининг маълум қилишича, қўлга олинган шахс Озарбайжонда туғилган. Унинг уйида хавфсизлик кучлари 175 минг фунт-стерлинг ва 500 доллар топган. Нашр маълумотларига кўра, қўлга олинган шахс “Amurov Group” МЧЖга раҳбарлик қилади ва ишда санкт-петербурглик тадбиркорларни мос равишда 9,6 миллион ва 22 миллион рублга алдаш бўйича икки эпизод бор.

Учинчи ҳолатда, иш материалларига кўра, қурилиш компаниясининг бош директори жабрланувчини 14,7 миллион фунт-стерлингга алдаган. Унга кўра, қўлга олинган шахсга қўйилган жиноятлар 2020 йилдан 2021 йилгача бўлган даврга тегишли.

Эслатиб ўтамиз, аввалроқ Россиянинг Екатеринбург шаҳрида озарбайжон диаспораси раҳбари Шаҳин Шихлинский ва унинг ўғли Мутвала Шихлинский ҳибсга олинганди.