Россияда мигрантлар учун янги давлат божлари жорий этилиши мумкин

Россияда жорий йилнинг сентябридан бошлаб мигрантлар учун еттита янги давлат божи жорий этилиши мумкин. Бу ҳақда мамлакат Молия вазирлиги тайёрлаган қонун лойиҳасига таяниб, “Известия” газетаси хабар берди.

Қонун лойиҳасига кўра, бошқа мамлакат фуқаролари яшаш жойи бўйича рўйхатга туриш учун 500 рубль тўлаши керак бўлади. Шунингдек, вақтинчалик яшаш муддатини узайтириш учун 1 минг рубль, ишга рухсатнома олиш учун эса 4,2 минг рубль миқдорида бож ундирилади.

Айрим ҳужжатларнинг дубликатларини бериш ва уларга ўзгартиришлар киритиш ҳам тўловга тортилади. Гап ишга рухсатномалар ва патентлар ҳақида бормоқда. Мос ҳужжатни олиш ёки унга тузатиш киритиш 2,1 минг рублга тушади. Патентни олиш ёки қайта расмийлаштириш эса 4,2 минг рублни ташкил этади.

Чет элликларни яшаш жойи бўйича рўйхатдан ўтказиш учун давлат божи ҳозирги 420 рубль ўрнига 1 минг рублга оширилади.

Тушунтирилишича, қонунга киритиладиган ушбу ўзгартиришлар муҳим миграция оқими туфайли назоратни кучайтириш учун зарур.

Эслатиб ўтамиз, аввалроқ Россия Президенти ҳузуридаги Фуқаролик жамияти ва инсон ҳуқуқлари бўйича кенгаш раиси Валерий Фадеев фарзандлари рус мактабларида ўқимайдиган меҳнат муҳожирларининг оилаларини чиқариб юборишга чақирганди.