Россияда энди поезд кўприк билан бирга қулаб тушди

Россиянинг Курск вилоятида темирйўл кўприги поезд билан биргаликда қулаб тушди. Бу ҳақда “Коммерсантъ” хабар берди.

Нашрнинг журналист Александр Хинштейнга таяниб хабар беришича, Тростна-Калиновка йўлининг 48-километрида кўприк устидан поезд ўтиб кетаётган вақтида у қулаб тушган. Ҳодиса оқибатида 1 киши жароҳатланган.

Журналистнинг ўз Telegram-каналида ёзишича, поезднинг бир қисми кўприк остидаги автомобиль йўлига ағдарилган. Поезд локомотивида ёнғин бошланган, лекин Фавқулодда вазиятлар хизмати ходимлари уни тезда ўчирган. Қолган вагонлар темирйўл платформасида қолган.

Курск вилояти расмийларининг маълумотларига кўра, локомотив ҳайдовчиларидан бирининг оёқлари шикастланган. Бутун гуруҳ шифохонага етказилган. Кўприк остидан ўтувчи автомобиль йўли ҳозирда ёпилган. Кўприкнинг қулаш сабабларини аниқлаш ишлари давом этмоқда.

Россия темирйўллари жамиятининг хабар беришича, ушбу ҳодиса узоқ масофали поездларнинг ҳаракатига таъсир қилмаган. Шаҳар атрофи поездлари чеклов билан ҳаракат қилмоқда ва автобуслар орқали ташувлар ташкил этилган.

Россияда фаолият юритувчи Telegram-каналларнинг ёзишича, ушбу воқеага кўприк портлаши сабаб бўлган. Жиноятчилар кўприк устунларига иккита портловчи мослама ўрнатган.
Ушбу қурилмалардан бири устунга, иккинчиси эса темирйўл йўлининг бошланишидан 30 метр масофада, йўл остига жойлаштирилган.

Оқибатда кўприкнинг бир қисми автомобиль йўлига қулаган, лекин бахтга қарши ўша пайтда йўлда автомобиллар бўлмаган.

Эслатиб ўтамиз, аввалроқ Россиянинг Брянск вилоятида автомобиль кўприги темирйўл устига қулаши оқибатида Москва томон ҳаракатланаётган йўловчи поезди рельсдан чиқиб кетганди. Брянск вилояти губернатори Александр Богомаз воқеа оқибатида 7 киши ҳалок бўлгани ва 66 киши жароҳатлангани ҳақидаги маълумотларни тасдиқлаган. Қизиғи шундаки, ушбу ҳодисани ҳам кўпчилик кўприк портлатилиши ортиқдан юз берган, деб ўйламоқда. Масъул ташкилотлар эса ушбу хабарларга ҳозирча изоҳ бермаган.