Россияда ҳарбий самолёт қулади. Қурбонлар бор (видео)

Бугун, 29 сентябрь куни Амур вилоятида Россия ҳарбий самолёти ҳалокатга учради. Оқибатда олти киши ҳалок бўлди, бир киши шифохонага ётқизилди. Бу ҳақда Россия оммавий ахборот воситалари хабар берди. 

“Shot” Telegram-каналининг ёзишича, ҳарбий самолёт Красноярово қишлоғи яқинида қулаган. Дастлабки маълумотларга кўра, бортда етти киши бўлган. Дастлаб улардан уч нафари ҳалок бўлгани, яна тўрт киши шифохонага ётқизилгани хабар қилинган эди. Кейинроқ, “Mash” нашри ҳалок бўлганлар сони олти кишига етганини – айрим ҳарбийлар шифохонага олиб кетилаётганда вафот этганини ёзган.

Қайд этилишича, Ту-95 самолёти ҳавога кўтарилганидан бир неча дақиқа ўтиб қулаган. Тахмин қилинишича, қулагандан сўнг самолётнинг ёнилғи баклари портлаган ва ҳаво кемаси ёниб кетган.

Мудофаа вазирлигининг аниқлик киритишича, самолёт ўқув-машғулот парвози вақтида ҳалокатга учраган. У жанговар тўпламсиз бўлган ва аҳоли яшамайдиган ҳудудга қулаган. Идора экипажнинг олти нафар аъзоси ҳалок бўлганини, бир киши жароҳат олганини тасдиқлаган.

Эслатиб ўтамиз, аввалроқ Конго Демократик Республикасида ҳарбий самолёт ҳалокатга учраши оқибатида бортдаги 13 кишининг барчаси ҳалок бўлганди.