Россияда ҳам самолёт қулади. Қурбонлар бор (видео)

Бугун, 20 февраль куни Россиянинг Нижний Новгород вилоятининг Кстовский туманида самолёт қулаши оқибатида икки киши ҳалок бўлди. Бу ҳақда мамлакат Фавқулодда вазиятлар вазирлиги хабар берди. 

Маълум қилинишича, воқеа Новоликеево қишлоғи яқинида содир бўлган. RV-7 енгил самолёти қаттиқ қўнган ва ёниб кетган, оқибатда икки киши ҳалок бўлган. Ёнғин жойига олти нафар ўт ўчирувчи ва қутқарувчи ҳамда икки техника етиб келган.

“Воқеа сабабларини тергов органлари аниқлайди”, дейилади хабарда.

Қолаверса, Россия Тергов қўмитасининг Транспорт бўйича Марказий минтақалараро тергов бошқармаси бортда учувчи ва йўловчи бўлганини маълум қилган.

Эслатиб ўтамиз, кеча, 19 февраль куни АҚШнинг Аризона штати жанубида иккита кичик самолётнинг тўқнашуви оқибатида икки киши ҳалок бўлганди. Миллий транспорт хавфсизлиги кенгаши маълумотларига кўра, ҳар бир самолёт бортида икки киши бўлган. Тўқнашув Туксон шаҳри яқинидаги Марана минтақавий аэропорти яқинида содир бўлган.