Россия ва АҚШ яширинча муҳокамалар ўтказди

Август ойида Россия ва АҚШ вакиллари энергетика соҳасида бир нечта эҳтимолий келишувларни муҳокама қилди. Бу ҳақда беш нафар манбага таяниб, “Reuters” хабар берди.

Манбаларнинг сўзларига кўра, АҚШ ушбу келишувлар орқали Россия раҳбариятидан Украина бўйича тезроқ тинчликка эришишни хоҳламоқда.

Нашр маълумотига кўра, музокараларда Exxon Mobil компаниясининг “Sakhalin-1” лойиҳасига қайтиши, Россия АҚШ ускуналарини суюқ газ ишлаб чиқаришда ишлатиши ва ҳатто АҚШ томонидан Россиядан атом музёрар кемаси (ледокол) сотиб олиниши каби вариантлар тилга олинган.

Манбаларнинг қўшимча қилишича, ушбу суҳбатлар август бошида АҚШ Президенти Дональд Трампнинг Яқин Шарқ бўйича махсус вакили Стив Уиткоффнинг Москвага сафари чоғида бўлиб ўтган. У Россия Президенти Владимир Путин билан учрашган. Мавзу 15 август куни Аляскада бўлиб ўтган саммитда ҳам қисқа муҳокама қилинган.

Шунингдек, CNN нашрига кўра, Дональд Трамп маъмурияти Россияга “Украина масаласини силжитиш” учун бизнес келишуви таклиф қилиш имкониятини кўриб чиқмоқда. Унга кўра, Россияга нафақат иқтисодий ҳамкорлик, балки стратегик қуроллар бўйича келишув ҳам таклиф қилиниши мумкин.

Эслатиб ўтамиз, кеча, 25 август куни АҚШ Президенти Дональд Трамп бундан буён Россия-Украина можаросини ҳал қилиш учун пул сарфламаслигини айтганди.