Россия Украинадаги обектларни бомбардимон қилди. Қурбонлар бор (видео)

Россия қўшинларининг бугун, 5 сентябрга ўтар кечаси Украинага уюштирган тунги ҳужуми оқибатида камида тўрт киши ҳалок бўлди, яна тўққиз киши жароҳатланди. Бу ҳақда “Meduza” хабар берди.

Днепропетровск вилояти раҳбари Александр Ганжанинг маълум қилишича, зарба Днепропетровск, Николаев ва Киев вилоятларидаги объектларга зарар етказган. Ҳужум оқибатида тўрт киши ҳалок бўлган, яна беш киши яраланган.

Шунингдек, Россия дронлари Николаевдаги савдо марказларидан бирига ҳужум қилган. Оқибатда икки киши жароҳатланган.

Киев вилоятининг Буча туманида Россия зарбаси оқибатида омборхонада ёнғин чиққан. Борисполда эса зарба оқибатида тўққиз қаватли тураржой биноси қисман вайрон бўлган ва ёнғин юзага келган. Икки киши яраланган.

Россия Мудофаа вазирлиги эса Днепропетровск вилоятида ҳарбий мақсадларда фойдаланиладиган маҳсулотлар етказиб берувчи иккита металлургия комбинатига зарба берилганини маълум қилган. Россия томонининг билдиришича, Николаевдаги нишон логистика маркази ва электр подстанцияси, Киев вилоятидаги нишонлар эса омборхоналар бўлган.

Эслатиб ўтамиз, кеча, 4 сентябрь куни Россия дрони Украина Хавфсизлик хизматининг (УХХ) Киевдаги қароргоҳига зарба берган эди.