Россия Украина бўйича музокаралар столига қайтишга тайёр – Путин

Россия томони Украина можаросини ҳал қилиш учун музокаралар столига қайтишга тайёр. Бу ҳақда бугун, 19 февраль куни Россия Президенти Владимир Путин журналистлар билан учрашувда сўз очди.

Унинг айтишича, Украина Россия ва АҚШ делегацияларининг Ар-Риёддаги учрашувида иштирок этмагани учун уларнинг “ажралиб” қолишига асос йўқ, чунки ҳеч ким Киевни музокаралар жараёнидан четлаштирмаяпти.

“Россия ҳеч қачон Украина билан музокара жараёнидан бош тортмаган, ҳеч қачон. Бизнинг бу музокаралардаги ҳамкорларимиз рад этди, европаликлар Россия билан алоқани тўхтатди, Украина томони эса ўзига музокаралар олиб боришни тақиқлаб қўйди, Истанбулдаги музокара жараёнидан чиқди ва буни тўғридан тўғри очиқ айтди”, деган Путин журналистларга.

Путиннинг айтишича, Дональд Трамп билан телефон орқали мулоқот чоғида АҚШ Президенти музокара жараёни Россия ва Украина иштирокида ўтишини таъкидлаган.

Россия етакчисининг айтишича, у Дональд Трампга қисқа вақт ичида Россия-Украина можаросини ҳал қилишнинг иложи йўқлиги ҳақида аллақачон айтган ва АҚШ Президенти қўшимча маълумот олгач, бу масала бўйича ўз позициясини ўзгартирган.

“Ҳозир муддатлар ҳақида гапирмайлик. Лекин бу табиий, бу ерда алоҳида нарса йўқ. У маълумот олишни бошлади, шунинг учун бироз вақт керак”, деган Путин.

Эслатиб ўтамиз, кеча, 18 февраль куни брифингда Россия Президенти матбуот котиби Дмитрий Песков ҳам Россия Президенти Владимир Путин Украина Президенти Владимир Зеленский билан музокарага тайёрлиги, бироқ Россия Зеленский ҳокимиятини қонуний эмас деб ҳисоблашини ҳам инобатга олиш кераклиги ҳақида гапирганди. Песковнинг сўзларига кўра, Путиннинг шахсан ўзи Зеленский билан музокаралар олиб бориш истаги борлигини бир неча бор билдирган.