Россия президентлигига собиқ номзод “хорижий агент” деб топилди

Россия Адлия вазирлиги 2024 йилги президентлик сайловларига ўз номзодини илгари сурган сиёсатчи Борис Надеждинни “хорижий агент” деб тан олди. Бу ҳақда “Интерфакс” хабар берди.

Қайд этилишича, шунингдек, реестр журналист Екатерина Воропай, тадбиркор ва Арктика туризми бўйича эксперт Тимофей Рогожин ҳамда “Штаб кандидатов” (“Номзодлар штаби”) ташкилоти билан тўлдирилган.

Адлия вазирлиги Надеждиннинг “хорижий агент” деб тан олинишига асос бўлган омиллар қаторида рухсат этилмаган митинг ва пикетларда иштирок этишга чақириқларни кўрсатмоқда. Бундан ташқари, унга “хорижий агентлар” контентини яратиш ва тарқатиш, “номақбул ташкилот” контентини яратиш, Россия расмийларининг қарорлари ва сиёсати, шунингдек, Россия сайлов тизими ҳақида фейк маълумотларни тарқатиш айбловлари қўйилган.

Вазирлик маълумотларига кўра, Воропай Россия ҳукумати ҳақида фейклар тарқатган, “махсус ҳарбий операция”га қарши чиққан, “хорижий агентлар” контентини яратиш ва тарқатишда ҳамда “номақбул ташкилотлар” контентини тарқатишда иштирок этган, шунингдек, “хорижий агентлар” билан ҳамкорлик қилиб келган.

Пресс-релиздан аён бўлишича, Рогожин “хорижий агентлар” ва “номақбул ташкилотлар” контентини, Россия ҳукумати ҳақидаги фейкларни тарқатган ҳамда “махсус ҳарбий операция”га қарши чиққан.

“Штаб кандидатов” бирлашмаси Россия Федерацияси оммавий ҳокимият органлари томонидан қабул қилинаётган қарорлар ва улар юритаётган сиёсат, шунингдек, Россия Федерациясининг сайлов тизими ҳақида нотўғри маълумотлар тарқатган. Халқаро агент билан фаол ҳамкорлик қилади, бирлашма асосчиси эса Россия Федерацияси ҳудудидан ташқарида истиқомат қилади”, дея баёнот берган Россия Адлия вазирлиги.

Эслатиб ўтамиз, 2024 йилда Борис Надеждин “Фуқаролар ташаббуси” партиясидан президентлик сайловларига ўз номзодини кўрсатган эди. Марказий сайлов комиссияси уни қўллаб-қувватлаш учун тўпланган имзоларнинг 15 фоиздан ортиғини ҳақиқий эмас деб топган ва уни рўйхатга олишни рад этган эди. Ушбу рад этиш қарори судлар томонидан ҳам ўз кучида қолдирилган.