Россия Навальнийнинг қурбақа заҳридан ўлгани ҳақидаги айбловларга жавоб берди

Россия Кимёвий қуролларни тақиқлаш ташкилотининг (КҚТТ) Техник котибиятига расмий нота юборди. Бу ҳақда Россиянинг ташкилотдаги доимий вакили Владимир Тарабрин маълум қилди.

Ҳужжатда Ғарб давлатлари томонидан Россия мухолиф сиёсатчиси Алексей Навальнийнинг икки йил олдин эпибатидин токсини билан заҳарланиши ҳақидаги барча айбловлар қатъиян рад этилади.

“Биз КҚТТ Техник котибиятига тегишли нота юбордик ва уни ташкилотнинг барча аъзо давлатлари ўртасида тарқатишни сўрадик. Бизга қаратилган асоссиз уйдирмаларни қатъиян рад этамиз. Шу билан бирга, биз Россия Федерацияси ҳар доим фактларга асосланган эксперт муҳокамаларига очиқ эканлигини таъкидлаймиз”, деган у.

Тарабрин, шунингдек, эпибатидинни ўз ичига олган токсинлар КҚТТ томонидан эмас, балки Бактериологик ва токсин қуролларини тақиқлаш тўғрисидаги конвенция томонидан тартибга солинишини эслатган. Шунинг учун бу моддалар КҚТТ доирасида муҳокама мавзуси бўла олмайди.

Эслатиб ўтамиз, жорий йилнинг 14 февраль куни Германия, Британия, Нидерландия, Швеция ва Франция қўшма баёнот берган эди. Ҳужжатда Навальний Эквадор дарахт қурбақасининг терисидан олинган эпибатидин токсини билан заҳарлангани айтилган. Маълумотларга кўра, бу хулосага Навальнийнинг биоматериал намуналарини таҳлил қилиш асосида эришилган.