Россия Курскнинг 64 фоизини қайтариб олганини эълон қилди

Россия Қуролли Кучлари Украина назорати остидаги Курск вилоятининг 64 фоизини қайтариб олганини эълон қилди. Бу ҳақда бугун, 20 февраль куни Россия Қуролли Кучлари Бош штаби бош оператив бошқармаси бошлиғи, Бош штаб бошлиғининг биринчи ўринбосари, генерал-полковник Сергей Рудской мамлакат Мудофаа вазирлигининг “Қизил юлдуз” газетасига берган интервьюсида маълум қилди.

“Украина Қуролли Кучлари назорати остидаги Курск вилояти ҳудуди икки баробардан кўпроққа қисқарди. Душман томонидан эгалланган дастлабки 1 268 квадрат километр майдондан 800 квадрат километрдан ортиғи озод қилинди, бу эса 64 фоизни ташкил қилади”, дейди Рудской.

Унинг сўзларига кўра, Россия қўшинлари Курск вилоятининг барча йўналишларида олдинга силжимоқда, Украина армияси эса катта йўқотишларга учраб, позицияларини тарк этмоқда.

Бундан ташқари, Россия генерали 2024 йилда – уруш давомида Украина йўқотишлари ҳақидаги Россия ҳисоб-китобларини келтирган.

“590 минг ҳарбий ҳалок бўлган ёки яраланган”, дейди у.

Жорий йилнинг 4 февраль куни Украина Президенти Владимир Зеленский британиялик журналист Пирс Морган билан интервьюда Украинанинг умумий йўқотишлари 45 100 нафар ҳарбийдан иборат эканини билдирган эди. Шунингдек, унинг сўзларига кўра, 390 минг украиналик ҳарбий яраланган. Зеленский Россия йўқотишларига ҳам тўхталиб, уруш давомида 350 минг россиялик аскар ҳалок бўлганини, яна 600-700 минг нафари яраланганини таъкидлаган эди.

11 февраль куни Зеленский “The Guardian” газетасига берган интервьюсида Россия Президенти Владимир Путинга Курск вилояти устидан назоратни Украина тасарруфига бериш эвазига Россия назоратидаги Украина ҳудудлари билан алмашишни таклиф қилишини маълум қилган. Бироқ у айнан қайси ҳудудларни назарда тутаётганини очиқламаган. Москва бу таклифни рад этиб, Курск вилоятини ҳарбий йўл билан қайтариб олишини билдирган.

Маълумот учун, Украина Қуролли Кучлари 2024 йил август ойидан бери ушбу ҳудудни назорат қилиб келмоқда. 19 февраль куни Россия Президенти Владимир Путин Санкт-Петербургда дрон ишлаб чиқариш заводига ташрифи чоғида Россия Қуролли Кучларининг 810-гвардиячи алоҳида денгиз пиёда бригадаси Курск вилояти орқали Украина ҳудудига кирганини маълум қилганди.

Украина ҳукуматига қарашли Дезинформацияга қарши кураш маркази раҳбари Андрей Коваленко бу маълумотни рад этган. AFP агентлигининг хабар беришича, у Путин томонидан эълон қилинган кенг кўламли ҳужум ҳақидаги маълумотни “ёлғон” деб атаган. Коваленкога кўра, Россиянинг диверсия-разведка гуруҳи Курск вилоятидан Украина ҳудудига киришга уринган, бироқ муваффақиятсизликка учраб йўқ қилинган.

Эслатиб ўтамиз, аввалроқ Россия томони Украина можаросини ҳал қилиш учун музокаралар столига қайтишга тайёрлигини билдирганди.