Россия Киевга баллистик ракеталар билан зарба берди. Қурбон бор (видео)

Россия қўшинлари бугун, 19 октябрга ўтар кечаси Украина пойтахти Киевга баллистик ракеталар билан ҳужум қилди. Оқибатда 21 ёшли қиз ҳалок бўлиб, 8 киши жароҳатланди. Бу ҳақда “Meduza” хабар берди.

Киев мэри Виталий Кличконинг маълум қилишича, ҳужум оқибатида Деснянский ва Днепр туманларидаги биноларга зарар етган. Соломенский туманида эса ракета парчалари 25 қаватли турар жой биносининг биринчи қаватига келиб тушган. Бу ерда 5 киши жароҳатланган.

Шунингдек, Днепр дарёсининг чап соҳилидаги Киев метро бекатларидан бири шикастланган. Мэр бекатга етган зарар ҳақида батафсил маълумот бермаган.

Украина Фавқулодда вазиятлар давлат хизмати ҳужум оқибатида 1 киши ҳалок бўлгани ва 8 киши жароҳатланганини маълум қилган.

“Радио Свобода” журналисти Алекс Рауфўғлу Украина Киевга қилинган баллистик ракета ҳужуми ҳақида яна олдиндан огоҳлантирилмаганини айтган.

АҚШ Давлат котиби Марко Рубио журналистнинг бу борадаги саволига жавобан ўтган тунда нима бўлганини билмаслигини билдирган. Унинг айтишича, бир неча кеча олдин Украинанинг эрта огоҳлантириш тизимида дастурий таъминот билан боғлиқ муаммо юзага келган.

“АҚШ Қуролли кучларининг Европа қўмондонлиги (EUCOM) бу масалани ўрганмоқда”, деган Рубио. У, шунингдек, бошқа изоҳ беришдан бош тортган.

Эслатиб ўтамиз, аввалроқ Украина Россияга қарши 1 000 дан ортиқ дрон билан ҳужум қилганди. Оқибатда Санкт-Петербургдаги нефть экспорти терминали ва нефть базасида ёнғин чиқиб, бир киши ҳалок бўлган, беш киши жароҳатланган.