Россия исталган вақтда НАТОга ҳужум қилиши мумкин – немис генерали

Россия ҳозирги ҳарбий салоҳияти билан НАТО ҳудудига чекланган ҳужумни исталган вақтда бошлай олади, аммо бундай қарор Ғарб иттифоқчиларининг позициясига боғлиқ бўлади. Бу ҳақда Германия қўшма операциялар қўмондонлиги бошлиғи генерал-лейтенант Александр Соллфранк “Reuters” агентлигига берган интервьюсида сўз очди.

“Агар Россиянинг ҳозирги имкониятлари ва жанговор қудратига назар ташласак, Россия НАТО ҳудудига нисбатан кичик кўламли ҳужумни эртагаёқ бошлаши мумкин. Бу кичик, тезкор, маҳаллий чекланган ҳужум бўлади – катта нарса эмас, чунки Россия Украинада жуда кўп кучини ишга солган”,  дейди генерал.

Соллфранк, шунингдек, НАТО раҳбариятининг огоҳлантирувларини такрорлаб, агар Россия қуролланишни жадаллаштиришни давом эттирса, у ҳолда 2029 йилга келиб, 32 аъзодан иборат иттифоққа қарши кенг кўламли ҳужум уюштириш имкониятига эга бўлиши мумкинлигини айтди.

Президент Владимир Путин Россия ҳеч қандай тажовузкор ниятга эга эмаслигини, Москва 2022 йилда Украинага қўшни бўлган НАТОнинг “экспансионист ниятларига қарши мудофаа” мақсадида ҳужум қилганини таъкидлайди.

Берлиннинг шимолидаги қўмондонлик қароргоҳида сўзлар экан, Соллфранк Россия Украинадаги йўқотишларга қарамай, ҳаво кучлари ҳали ҳам сезиларли жанг қудратига эга эканини, ядровий ва ракета кучлари эса умуман заифлашмаганини қайд этди.

Шунингдек, у Қора денгиз флоти катта йўқотишларга учраганини, аммо Россиянинг бошқа флотлари сезиларли равишда қисқармаганини билдирди.

“Қуруқлик қўшинлари йўқотиш кўрмоқда, аммо Россия умумий армия сонини 1,5 миллион аскарга етказиш ниятида. Россияда етарли миқдорда асосий жанг танклари бор ва бу унинг чекланган ҳужумни эртагаёқ амалга ошириши мумкинлигини кўрсатади”, деди Соллфранк, бироқ у бундай ҳужум режалаштирилаётганини тасдиқламади.

Соллфранк 2024 йилда ташкил этилган Германия қўшма операциялар қўмондонлигини бошқаради, бу Афғонистон ёки Малидаги экспедиция миссияларидан НАТО ҳудудини ҳимоя қилишга ўтишдаги янги стратегик бурилишни англатади. У бу лавозимга келгунга қадар Германиянинг жанубидаги Ульм шаҳрида жойлашган НАТОнинг логистика буйруқ маркази – JSEC'ни бошқарган.