Россия дрони Чернобиль АЭСга урилиб, ёниб кетди (видео)

Россия армияси жанговар дрон билан Чернобиль атом электр станциясининг иншоотига зарба берди. Бу ҳақда Украина Президенти Владимир Зеленский ўзининг Telegram-каналида маълум қилди. 

“Россиянинг жанговар дрони ушбу тун Чернобиль АЭСнинг вайрон бўлган 4-энергоблокидан нурланиш тарқалишининг олдини олувчи ҳимоя иншоотига келиб урилди”, деди Зеленский.

Унинг сўзларига кўра, зарба оқибатида гумбаз шикастланган ва ёнғин келиб чиққан, бироқ тезда ўчирилган. Радиация кўрсаткичининг ошиши қайд этилмаган. Зеленский иншоот жиддий зарар кўрганини қўшимча қилиб, ҳимоя қопламаси тешилганини билдирди.

“Дунёда бундай объектларга ҳужум қилиши, атом электр станцияларини босиб олиши ва оқибатларини ҳисобга олмаган ҳолда ҳарбий ҳаракатлар олиб бориши мумкин бўлган ягона давлат бу – ҳозирги Россия. Ва бу бутун дунё учун террористик таҳдид”, деб ёзди Украина етакчиси.

У, шунингдек, бундай ҳужумлар Россия Президенти Владимир Путиннинг тинчлик музокараларига тайёр эмаслигини исботлашини айтди. Зеленскийнинг таъкидлашича, гап эски “Укрытие” объекти устидан Украина мутахассислари бошқа давлатлар билан ҳамкорликда қуриб, 2019 йилда фойдаланишга топширган янги “Саркофаг” ҳақида кетмоқда. Зарба айнан ушбу янги иншоотга – Янги хавфсиз конфинементга (Nеw Safe Confinement – NSC) қаратилган. 45 дан ортиқ донор давлат ушбу объект қурилиши учун 2,2 миллиард евро ажратган. Унинг вазифаси вайрон бўлган энергоблокни ташқи муҳитдан изоляция қилиш ва радиоактив чанг ҳамда аэрозолларнинг тарқалишига йўл қўймаслик.

Халқаро атом энергияси агентлиги (МАГАТЭ) бугун, 14 февраль тунги соат 01:50 атрофида Чернобиль АЭСда портлаш содир бўлгани, шундан сўнг NSC устида ёнғин келиб чиққанини тасдиқлаган. У ерда жойлашган агентлик ходимлари дрон ҳимоя иншооти томига келиб урилганини билдирган.

“Ёнғин хизмати бир неча дақиқа ичида жавоб қайтарди. Ҳозирча ички ҳимоя қобиғи бузилгани ҳақида ҳеч қандай белгилар йўқ. Ички ва ташқи радиация даражаси нормал ва барқарор. Қурбонлар ҳақида маълумот йўқ. МАГАТЭ вазиятни кузатишда давом этмоқда”, дейилади агентлик баёнотида.

Эслатиб ўтамиз, аввалроқ Украинадаги Запорожье атом электр станциясига кетаётганда Атом энергияси бўйича Халқаро агентликнинг (МАГАТЭ) расмий автомобилига дрон билан зарба берилиб, унга жиддий зарар етказилганди.