Россия Днепрга оммавий дрон ҳужуми уюштирди. Қурбонлар бор

Кеча, 28 март куни тунда Россия армияси Украинадаги Днепр шаҳрига дронлар ёрдамида оммавий ҳужум уюштирди – бу ҳафта ичида иккинчи марта. Ҳужум оқибатида Bartolomeo меҳмонхонаси ҳам зарба остида қолган. Шаҳар ўққа тутилиши оқибатида тўрт киши ҳалок бўлган, 20 дан ортиқ киши яраланган. Бу ҳақда Днепропетровск вилояти ҳарбий маъмурияти раҳбари Сергей Лисак ўзининг Telegram-каналида маълум қилди. 

Лисакнинг сўзларига кўра, Россия вилоят марказига 20 дан ортиқ дрон юборган (уларнинг 16 таси уриб туширилган). Бугун, 29 март тонгига келиб шаҳарда тўрт кишининг ҳалок бўлгани қайд этилган.

“Жами 21 киши жароҳат олган. Уларнинг энг ёши 19 ёш, энг кекса жабрланувчининг ёши 74 да”, деб ёзди Лисак.

Билдирилишича, шифохоналарда 13 нафар жароҳатланган киши қолмоқда, улар орасида 27 ёшли ҳомиладор аёл ҳам бор. Ижтимоий тармоқларда тарқалган хабарларга кўра, дронлар Днепр соҳилидаги 4 юлдузли Bartolomeo меҳмонхонасига зарба берган. Шундан сўнг меҳмонхона ва унинг ёнидаги кема-ресторанда ёнғин келиб чиққан. Лисакнинг сўзларига кўра, ҳужум оқибатида тўртта уй бутунлай ёниб кетган, яна камида 10 таси зарар кўрган. Дронлар бир нечта кўп қаватли уйлар, ўқув муассасаси, маъмурий бино, омборхона, гаражлар, ўнлаб автомобиллар ва бир неча мотоциклларга зарар етказган.

Украина Фавқулодда вазиятлар давлат хизмати Россия зарбаси кенг кўламли вайронагарчилик ва ёнғинларга олиб келганини тасдиқлаган. Меҳмонхона-ресторан мажмуаси ва тураржойлар билан бир қаторда икки ёнғин-қутқарув техникаси ҳам зарар кўрган. Шунингдек, эрта тонгда Россия Днепропетровск вилоятининг Никополь туманига ҳужум уюштирган. Камикадзе дронлари Марганец ва Межевский ҳудудларига зарба берган, оқибатда бир уй томи шикастланган.

Украина Қуролли кучлари ҳаво қўшинлари ҳисоботига кўра, Россия умумий ҳисобда 172 та “Шаҳед” ва дрон-имитатор юборган. Улардан 94 тасини уриб туширишга муваффақ бўлинган. Ҳарбийларнинг қайд этишича, Россиянинг ҳужуми оқибатида Днепропетровск, Харьков ва Суми вилоятлари зарар кўрган.

Маълумот учун, 27 март куни ҳам Днепрга ҳужум амалга оширилган эди. Шаҳар мери Борис Филатовга кўра, ўша куни уруш бошидан буён энг кенг кўламли ўққа тутишлардан бири содир бўлган. Камида 20 та кўп қаватли уй зарар кўрган, шаҳардаги мактаблардан бирида ойналар синиб кетган.

Эслатиб ўтамиз, 23 мартга ўтар кечаси Россия Украинага 147 та дрон ва дрон-имитаторлардан фойдаланган ҳолда ҳужум қилган эди. Киевда Россия дронларининг йирик зарбаси оқибатида уч киши ҳалок бўлган. Киевнинг Подольск туманида 25 қаватли тураржой биносининг 20-қаватидаги 20 квадрат метр майдондаги ёнғин бартараф этилган. Голосеев туманида тўрт қаватли офис-омбор биноси ёниб кетган, ёнғин майдони 2 минг квадрат метрни ташкил этган.