Россия Днепр ва Черниговга ҳужум қилди. 15 киши ҳалок бўлди

Россия дронлари Украинанинг Днепр шаҳридаги темир йўл вокзали ва Чернигов шаҳрига зарба берди. Ҳужумлар оқибатида ҳалок бўлганлар сони 15 нафарга етди. Бу ҳақда маҳаллий нашрлар хабар қилди. 

Днепропетровск вилояти ҳарбий маъмурияти раҳбари Александр Ганжа ҳужум ҳақида хабар берди. Днепр мэри Борис Филатов ҳам воқеани тасдиқлаган. Зарба Днепр—Запорожье йўналишида ҳаракатланувчи 866-сонли поезд турган платформалардан бирига берилган. Оқибатда 13 киши ҳалок бўлган, яна 10 киши жароҳат олган. 

Шу билан бирга, Россия Чернигов шаҳрига ҳам зарба берган. Ҳужум оқибатида 15 ёшли икки қиз ҳалок бўлган. Украина Фавқулодда вазиятлар давлат хизмати маълумотларига кўра, зарба шаҳар марказига берилган. Тўққиз киши, жумладан, икки бола жароҳат олган. Чернигов шаҳар кенгаши эса жабрланганлар сони 11 нафарга етганини маълум қилган. Ҳужум оқибатида иккита автомобиль ёниб кетган, дўконлардан бирида ҳам ёнғин чиққан.

Украина Президенти Владимир Зеленский АҚШ ва Европа давлатларини Россия ҳужумларига нисбатан қатъийроқ чора кўришга ва Москвага қарши санкцияларни кучайтиришга чақирган.

“Россиянинг бу уруши давом этар экан, Москва ва унинг ҳарбий тизимига қарши санкциялар юмшатилмаслиги керак. Европа Иттифоқи, АҚШ ва G7 томонидан янги, янада кучли санкциялар жорий этиш вақти келди”, дейди Зеленский.

Қайд этиш жоиз, 2026 йилда Россия Украинанинг темир йўл инфратузилмасига ҳужумларни кучайтирди. Йил бошидан буён 1 700 та темир йўл объекти ҳужумга учраган. Жумладан, 120 та йўловчи вагони, 304 та локомотив ва 43 та темир йўл станцияси шикастланган. Шу даврда 50 нафар темир йўл ходими хизмат вазифасини бажараётган вақтида ҳалок бўлган. Ҳужумлар кўпайгани сабабли темир йўлда хавфсизлик чоралари кучайтирилган. Ҳаво ҳужуми хавфи эълон қилинганда йўловчилар поездлардан эвакуация қилинмоқда. Айрим ҳолларда бир қатнов давомида бир неча марта эвакуация ўтказишга тўғри келмоқда.

Бу эса поездлар ҳаракатида сезиларли кечикишларга сабаб бўляпти. Масалан, Днепр—Одесса йўналишидаги поездлар 5–12 соатгача кечикиши мумкин.

Эслатиб ўтамиз, 22 октябрь куни Украина ва Россия ўзаро дрон ва ракета ҳужумларини амалга оширган эди. Ҳужумлар оқибатида Украинада камида етти киши, Россиянинг Белгород вилоятида эса бир киши ҳалок бўлди.