Россия армиясига ёлланган наманганлик “Дед” қамалди 

2023 йилда Россия армиясига шартнома асосида ёлланган наманганлик 55 ёшли эркак Р.К. 2 йилга озодликдан маҳрум қилинди. QALAMPIR.UZ суд ҳужжати билан танишди. 

Ҳужжатга кўра, эркак 2023 йилнинг май ойида Қирғизистон орқали Россия Федерациясига мавсумий ишлаш мақсадида борган. У Россияда бироз муддат ишлаганидан сўнг, мамлакат Федерал миграция хизмати (ФМХ) идорасига патент олиш учун мурожаат қилган. Лекин ФМХ ходимлари унга патент берилмаслигини, бироқ Россия-Украина ўртасидаги урушда иштирок этиш учун шартнома имзоласа, унга Россия фуқаролиги берилишини ҳамда мамлакат ҳудудида ишлаши мумкинлигини айтган. 

Шундан сўнг, Р.К. 2023 йил июнь ойида Россия Мудофаа Вазирлиги билан Украинага қарши қуролли тўқнашувларда иштирок этиш мақсадида ўз ҳохишига кўра бир йиллик шартнома имзолаган. У Россия Қуролли кучлари сафида “машинист механик” бўлиб, шартли “Дед” “позывной”и остида хизмат қилган. Р.К. Россия армияси сафида Украинага қарши урушда қатнашгани учун 700 минг рубль миқдорида бир марталик мукофот пули ва ҳар ой ўртача 150-200 минг рубль (25-30 млн сўм) миқдорда ойлик маош олиб келган. У Украина билан чегарадаги Белгород шаҳридаги Россия армиясига қарашли 02511-сонли ҳарбий қисмда уруш мақсадларида фойдаланиладиган ҳарбий транспорт воситаларини техник таъмирлаш ишлари билан шуғулланган. 2024 йилнинг май ойларида Р.К. соғлиғидаги жиддий ўзгаришлар туфайли хизматдан озод этилган ва 2024 йилнинг июнь ойи охирларида Ўзбекистонга қайтиб келган.

Жорий йилнинг 11 сентябрь куни жиноят ишлари бўйича Наманган шаҳар судида мазкур иш кўриб чиқилган. Судда Р.К. айбига тўлиқ иқрор бўлган. Унинг кўрсатмасига кўра, 2023 йилнинг май ойида Санкт-Петербург шаҳридаги ФМХ идорасига патент олиш мақсадида борганида, унга аввал Россияда хуқуқбузарликлар содир этгани учун патент берилмаслигини айтишган. Шундан сўнг, Р.К. га Россия Қуролли кучлари билан шартнома тузиш таклифи берилган ва эркак бунга рози бўлган. Дастлаб, у шартнома тузиш учун ариза берганида фақат 50 ёшгача бўлганлар билан шартнома тузилиши айтилган, бироқ кейинроқ фронт орти хизмати учун камида 1 йиллик шартнома имзолаш таклифи берилган. Эркак бунга рози бўлган ва ҳужжатлар расмийлаштирилганидан кейин унга 700 минг рубль мукофот пули берилган. 

Р.К. нинг айтишича, 2023 йилнинг июль-август ойларида у Санкт-Петербург шаҳридаги Махсус ҳарбий базадан ҳарбий хизматчилар тўпланишини кутиб юрган. Россия Мудофа вазирлиги билан шартнома имзолаган ёлланган ҳарбий хизматчилар тўплангандан сўнг, уларни ёшга қараб саралаш ишлари олиб борилган. Сўнгра, 2023 йилнинг сентябрь ойларида Белгорад шаҳридаги ҳарбий қисмга юборишган. У ерда Р.К. “хайдовчи-механик” сифатида хизмат қилган. Россия Қуролли кучлари сафида хизмат қилиши мобайнида унга 2000 АҚШ доллар миқдорда ойлик маош тўланган. Ушбу пуллар унинг номидан турмуш ўртоғи Ю.Н. номига тушган. 2024 йилнинг апрель ойининг ўрталарида соғлиғида ўзгаришлар туфайли Р.К. Белгорад шаҳридаги кўп тармоқли ҳарбий поликлиникага мурожаат қилган, бироқ у ерда махсус шифокор бўлмагани сабабли уни Санкт-Петербург шаҳридаги ҳарбий Академия қошидаги ҳарбий госпиталга йўлланма орқали жўнатишган. Р.К. ҳарбий госпиталда 1 ой давомида “юрак ишемик” ташҳиси билан даволанган, сўнгра соғлиғини тиклаш мақсадида 2024 йилнинг июнь ойида “Санкт-Петербург – Тошкент” йўналиши орқали автобусда Ўзбекистонга – яшаш манзилига қайтиб келган.

Маълум бўлишича, Р.К. Украина ҳукумати томонидан “Хочу жить” номли Telegram-каналда эълон қилинган қуролли тўқнашувларда иштирок этган 1100 нафар ўзбекистонлик шахслар рўйҳатида бўлган. У мазкур рўйҳатнинг 392-қайд рақамида МТ-891289 шахсий рақами билан билан келтирилган. 

Суд ҳукми билан Р.К. Жиноят кодексининг 154-моддаси (ёлланиш) 1-қисмида назарда тутилган жиноятни содир қилганликда айбли деб топилган. Унга 2 йил муддатга озодликдан маҳрум қилиш жазоси тайинланган. Жазони умумий тартибли колонияларда ўташи белгиланган.

Эслатиб ўтамиз, аввалроқ Навоий вилоятининг Хатирчи туманида яшовчи 25 ёшли йигит Россия армияси сафида Украинага қарши урушда қатнашгани учун 4 йил озодликни чеклаш жазосига ҳукм қилинганди.