“Роналдуга йўқ деймиз”. Саудия пуллари ҳам Маркни қизиқтира олмади

Клублар ўртасидаги жаҳон чемпианатининг амалдаги чемпиони “Челси” ўз ҳимоячиси Марк Кукурелья билан шартномасини мустаҳкамлаш йўлида ҳаракатга тушди. Бу ҳақида танқили инсайдр Фабрицио Романо хабар берди.

Яқинда Испаниялик футболчига Саудия Арабистонининг “Ал-Наср” клуби жиддий қизиқиш билдиргани ҳақида хабарлар тарқалган эди. Маълумотларга кўра, бу трансфер ташаббусини шахсан клубнинг суперюлдузи Криштиану Роналду илгари сурган — у клуб раҳбариятидан Кукурельяни олиб келишни сўраган.

“Ал-Наср” жамоаси яқинда Жоау Феликсни ҳам ўз сафига қўшиб олган бўлиб, улар жаҳон футболининг юлдузларини жамлашда давом этмоқда. Бироқ Кукурелья бу таклифга рад жавобини берди. У ҳозирда “Челси” сафида ўзини яхши ҳис қилаётгани ва жамоадан кетишни истамаслигини билдирган.

“Челси” раҳбарияти эса бу вазиятни ижобий томонга буриш учун ҳаракат қилмоқда. Улар Кукурельяга яхшиланган молиявий шартлар асосидаги янги таклиф тайёрламоқда. Клуб футболчининг садоқатини қадрлайди ва уни жамоанинг узоқ муддатли режалари доирасида кўрмоқда.

Маълумот учун, Марк Кукурельянинг “Челси” билан амалдаги шартномаси 2028 йил 30 июнга қадар мўлжалланган. Демак, футболчининг келажаги тўлиқ Лондон клубининг қўлида.

Саудия Арабистони клублари кучли молиявий таклифлар билан кўплаб европалик юлдузларни ўзига оғдираётган бир паллада, Кукурельянинг “йўқ” дея олгани футбол мухлислари орасида унга нисбатан катта ҳурмат уйғотмоқда. У пул эмас, профессионал муҳит ва ўзининг спортдаги орзуларини устувор кўрмоқда.

Жаҳонгир Болтабоев