Роналду йўқ жойдан медалли бўлиши мумкин

Саудия Арабистонининг “Ал-Наср” клуби ҳужумчиси Криштиану Роналду “Манчестер Юнайтед”нинг Англия лига кубогидаги ғалабаси учун медаль олиши мумкин.

Ноябрь ойида жамоани тарк этган португалиялик футболчи жорий мавсумда лига кубогида бирорта ҳам ўйин ўтказмади, бироқ регламентда ғолиб жамоа 30 та медаль олади, деган банд бор. “Манчестер Юнайтед” лига кубогида 27 нафар футболчини рўйхатдан ўтказган. Қолган учта медални қайси футболчиларга беришни клубнинг ўзи ҳал қилади.

Шу тариқа, “манкунианликлар” истаса, Роналдуга медаль тақдим этади, шунингдек, 2022 йилнинг сентябридан 2023 йилнинг январигача ижара асосида “Манчестер Юнайтед”да ўйнаган “Ньюкасл” дарвозабони Мартин Дубравка ҳам МЮ томонидан тақдирланиши мумкин. 

Маълумот ўрнида, Роналду ва Дубравкага клуб лига кубоги медалларини тақдим этсада, улар турнир ғолиби ҳисобланмайди, чунки иккала футболчи ҳам мусобақада бирорта ўйин ўтказмаган.