Роналду “Реал” президентига мурожаат қилди

Криштиану Роналду “Реал Мадрид” клуби президенти Флорентино Пересга ўғлининг ёшлар жамоасида машғулот ўтказишига рухсат беришни сўраб мурожаат қилди. Бу ҳақда “Madrid Xtra” нашри хабар берди.

Манбанинг хабар беришича, португалиялик футболчининг 15 ёшли ўғли Криштиану Роналду Жуниор ҳозирда “Реал Мадрид”нинг 16 ёшгача бўлганлар жамоаси билан бирга шуғулланмоқда. Бироқ, ҳозирча тўлиқ кўрикдан ўтказиш ёки расмий келишув имзолаш масаласи кўриб чиқилмаяпти.

Манбаларга кўра, ушбу машғулотлар ёш футболчининг ўйин савияси ва жисмоний тайёргарлигини сақлаб туриш учун вақтинчалик чорадир. Шунингдек, “Реал Мадрид” уни таркибига қўшиб олишни ҳозирча режалаштирмаяпти.

Маълум қилинишича, Роналду Жуниорнинг Испанияда бўлиши унинг айни пайтда Саудия Арабистонидаги “Ан-Наср” клуби академиясида машғулотларни давом эттира олмаётгани билан боғлиқ.

Таъкидланишича, ёш футболчига “Реал Мадрид”да шуғулланиш имконияти отасининг шахсий илтимосидан сўнг берилган.