Роналду норозилик сабабли “Ал-Наср”ни тарк этиши мумкин

“Ал-Наср” клуби ҳужумчиси, португалиялик Криштиану Роналду жамоанинг ҳозирги ҳолатидан норозилиги сабаб Саудия Арабистонини тарк этиши мумкин. Бу ҳақда “Record” нашри хабар бермоқда.

Манбага кўра, футболчининг товон пули қиймати 50 миллион еврони ташкил этади. Унинг фаолиятини давом эттириши мумкин бўлган йўналишлар сифатида MLS ва Европа клублари кўриб чиқилмоқда.

Қайд этилишича, Роналду Саудия Арабистони Давлат инвестиция жамғармаси (PIF)нинг “Ал-Наср”га нисбатан муносабатидан норози. Мазкур жамғарма 2023 йилда мамлакатнинг тўртта етакчи клуби – “Ал-Наср”, “Ал-Ҳилол”, “Ал-Иттиҳод” ва “Ал-Аҳли”нинг назорат пакетини сотиб олган.

Португалиялик футболчи фонд томонидан бошқарилаётган бошқа клублар билан солиштирганда, “Ал-Наср” трансфер бозорида етарлича фаол эмаслигини танқид қилмоқда. Унинг фикрича, PIF жамоанинг чемпионликка эришиш имкониятини чеклаш мақсадида янги футболчилар билан шартнома имзолашга тўсқинлик қилмоқда.

Ҳозирда “Ал-Наср” чемпионат жадвалида “Ал-Ҳилол”дан атиги бир очко ортда қолмоқда ва чемпионлик учун курашни давом эттирмоқда.

Роналду Саудия Арабистони футболини ривожлантиришда ва унинг нуфузини оширишда муҳим роль ўйнаганини таъкидлаб, ўзига нисбатан кўпроқ ҳурмат бўлиши керак, деб ҳисоблайди. Шунингдек, у 2034 йилги Жаҳон чемпионатини тарғиб қилиш мақсадида Саудия Арабистонида ўтказиладиган мусобақанинг элчиси бўлишга розилик билдирган.

Хабарларга кўра, Роналду Про-лиганинг 20-турида “Ар-Риёд”га қарши баҳсда (1:0) майдонга тушишдан бош тортган. У биринчи Саудия Арабистони чемпионлигини қўлга киритиш ва 1000 та гол уриш бўйича шахсий мақсадларига эътибор қаратаётган бўлса-да, клубдаги мавжуд вазиятни адолатсиз деб баҳолаб, норозилик билдиришни лозим топган.