Роналду интернетни “портлатмоқчи”

“Ал-Наср”нинг португалиялик ҳужумчиси Криштиану Роналду YouTube каналидаги навбатдаги подкаст меҳмони жуда машҳур инсон эканлигини айтиб, мухлисларда катта қизиқиш уйғотди.

39 ёшли ҳужумчи видеохостингда “Манчестер Юнайтед”даги собиқ жамоадоши Рио Фердинанд билан суҳбатлашгани тасвирланган видеони жойлаштирди. Суҳбатда Фердинанд Криштианудан каналининг янги меҳмони ким бўлишини айтишни сўрайди. Роналду Риога бу сир эканлигини айтди, бироқ у машҳур инсон эканлигига шама қилди. 

“Биз интернетни “портлатамиз”, дейди Роналду.

Қайд этиш жоиз, ҳозирча Роналдунинг YouTube'даги контентларида айнан Рио Фердинанд ва португалиялик футболчининг севгилиси Жоржина Родригес кўриниш берди. Мухлислар эса Криштиану қачондир аргентиналик футбол юлдузи Лионель Месси билан подкаст қилишига ишонмоқда. 

Маълумот учун, Роналду август ойида ўз YouTube саҳифасини ишга тушириб, қисқа вақт ичида энг кўп обуначи йиғиш борасида дунё рекордини ўрнатди. Криштианунинг саҳифаси 7 кун ичида 50 миллиондан ортиқ обуначи йиғганди. “UR Cristiano” канали ҳозирда 67 миллиондан ортиқ обуначига эга. Футболчининг саҳифаси обуначилар сони бўйича рейтингда 32-ўринни банд этган. Бу борада 330 миллиондан ортиқ кузатувчига эга “MrBeast” етакчилик қилмоқда.