Ronaldu internetni “portlatmoqchi”

“Al-Nasr”ning portugaliyalik hujumchisi Krishtianu Ronaldu YouTube kanalidagi navbatdagi podkast mehmoni juda mashhur inson ekanligini aytib, muxlislarda katta qiziqish uyg‘otdi.

39 yoshli hujumchi videoxostingda “Manchester Yunayted”dagi sobiq jamoadoshi Rio Ferdinand bilan suhbatlashgani tasvirlangan videoni joylashtirdi. Suhbatda Ferdinand Krishtianudan kanalining yangi mehmoni kim bo‘lishini aytishni so‘raydi. Ronaldu Rioga bu sir ekanligini aytdi, biroq u mashhur inson ekanligiga shama qildi. 

“Biz internetni “portlatamiz”, deydi Ronaldu.

Qayd etish joiz, hozircha Ronalduning YouTube'dagi kontentlarida aynan Rio Ferdinand va portugaliyalik futbolchining sevgilisi Jorjina Rodriges ko‘rinish berdi. Muxlislar esa Krishtianu qachondir argentinalik futbol yulduzi Lionel Messi bilan podkast qilishiga ishonmoqda. 

Ma’lumot uchun, Ronaldu avgust oyida o‘z YouTube sahifasini ishga tushirib, qisqa vaqt ichida eng ko‘p obunachi yig‘ish borasida dunyo rekordini o‘rnatdi. Krishtianuning sahifasi 7 kun ichida 50 milliondan ortiq obunachi yig‘gandi. “UR Cristiano” kanali hozirda 67 milliondan ortiq obunachiga ega. Futbolchining sahifasi obunachilar soni bo‘yicha reytingda 32-o‘rinni band etgan. Bu borada 330 milliondan ortiq kuzatuvchiga ega “MrBeast” yetakchilik qilmoqda.