Роналду фаолиятини якунлайдими?

Португалия терма жамоаси ҳужумчиси Криштиану Роналду яқин вақт ичида ўз келажаги борасида қарор қабул қилишини маълум қилди. Бу ҳақда у Жаҳон чемпионатининг 1/8 финалида Испанияга қарши учрашувдан (0:1) сўнг гапирди.

Кеча, 6 июль куни бўлиб ўтган баҳсда Португалия Испанияга 0:1 ҳисобида мағлуб бўлиб, мусобақа билан хайрлашди. Учрашув арафасида 41 ёшли Роналду ушбу Жаҳон чемпионати унинг фаолиятидаги сўнгги мундиал бўлишини маълум қилган эди. Унинг Саудия Арабистонининг “Ал-Наср” клуби билан амалдаги шартномаси яна бир йилга мўлжалланган.

“Ростини айтсам, бу менинг сўнгги Жаҳон чемпионатим эди. Қолган масалалар бўйича эса ўйлаб кўриш, оилам билан вақт ўтказиш ва шошма-шошарлик билан қарор қабул қилмаслик учун имкониятим бор”, дейди Роналду.

У Португалиянинг мусобақани эрта тарк этганидан афсусда эканини ҳам яширмади.

“Албатта, Жаҳон чемпионатини шундай тарзда якунлаганимдан хафаман. Лекин матбуот анжуманида ҳам айтганимдек, майдонда бор кучимни сарфладим. Қўлимдан келган барча ишни қилдим ва виждоним тоза. Бу футбол. Футболчининг ҳаёти шундай: баъзан ғалаба қозонасиз, баъзан мағлуб бўласиз. Энг муҳими, олдинга интилишда давом этиш”, дейди португалиялик футболчи.

Маълумот учун, Криштиану Роналду фаолияти давомида беш марта Чемпионлар лигаси, бир марта Европа чемпионати ва икки марта UEFA Миллатлар лигасида ғолиб чиққан. Шунингдек, у миллий жамоалар сафида, Европа чемпионатлари, Чемпионлар лигаси ҳамда Клублар ўртасидаги жаҳон чемпионати тарихида энг кўп гол урган футболчи ҳисобланади.

Роналду 2022 йилнинг декабридан буён Саудия Арабистонининг “Ал-Наср” клубида тўп сурмоқда. Фаолияти давомида у Португалиянинг “Спортинг”, Англиянинг “Манчестер Юнайтед”, Испаниянинг “Реал Мадрид” ва Италиянинг “Ювентус” клублари шарафини ҳам ҳимоя қилган.