Роналду фаолиятини қачон якунлаши айтилди

Португалия терма жамоаси ва “Ал-Наср” клуби ҳужумчиси, 40 ёшли Криштиану Роналду 2027 йилда футболчилик фаолиятини якунлаши мумкин. Бу ҳақда журналист Бен Якобс ўзининг ижтимоий тармоқлардаги саҳифасида хабар берди.

Манбага кўра, Роналду ва “Ал-Наср” ўртасидаги 2027 йилгача мўлжалланган шартномани узайтириш режалаштирилмаяпти. Шу сабабли, португалиялик футболчи 42 ёшга кирганида фаолиятини якунлашга қарор қилиши эҳтимоли бор.

Қайд этилишича, Роналду бир неча бор фаолиятидаги асосий мақсади 1000 та гол уриш эканини таъкидлаган. Ҳозирда унинг ҳисобида 960 та гол мавжуд.

Маълумот учун, Криштиану Роналду 2023 йилдан буён “Ал-Наср” сафида тўп суриб келмоқда. Жорий ички чемпионатда у 16 та ўйинда майдонга тушиб, 16 та гол урди ва битта голли узатма амалга оширди.

Эслатиб ўтамиз, аввалроқ Роналду Пирс Морганга берган интервьюсида яқин келажакда фаолиятини тугатишни режалаштираётганини маълум қилган эди.