“Реал” президенти ўзгариши мумкин 

“Реал Мадрид” футбол клуби президенти Флорентино Перес кетма-кет иккинчи мавсум совринсиз якунланганидан сўнг клуб президентлиги учун муддатидан олдин сайловлар ўтказилишини эълон қилди. Бу ҳақда “El Confidencial” нашри хабар берди.

2025 йил январь ойида Перес яна тўрт йил муддатга “Реал Мадрид” президенти этиб қайта сайланган эди. 2009 йилдан буён клубдаги президентлик сайловлари рақобатсиз ўтиб келмоқда.

Переснинг таъкидлашича, клубдаги инқироздан унга қарши кампания сифатида фойдаланилмоқда. Шу боис у президентликка номзодини қўйишни истаганларни очиқчасига сайловларда иштирок этишга чақирди.

“Бу кампания ортида турганлар ҳақида гапирмоқчиман. Айтилишича, сайловларга тайёргарлик кўраётган, парда ортида ишлаётган одамлар бор. Мен уларни сайловларда иштирок этишга таклиф қиламан”,  дейди Перес.

79 ёшли Перес 2000–2006 йилларда “Реал Мадрид” президенти бўлиб ишлаган ва 2009 йилда яна ушбу лавозимга қайтган. Унинг бошқаруви даврида мадридликлар етти бор Ла Лига чемпиони, уч марта Испания кубоги соҳиби ва етти карра Суперкубок ғолибига айланган.

Шунингдек, клуб Перес даврида етти марта UEFA Чемпионлар лигаси, олти бор UEFA Суперкубоги, беш марта FIFA клублар ўртасидаги Жаҳон чемпионати ҳамда икки марта Қитъалараро кубокни қўлга киритган.