“Реал Мадрид” Испанияда энг кўп ҳақорат қилинган жамоага айланди

Испаниянинг “Реал Мадрид” жамоаси ижтимоий тармоқлардаги ҳақоратли постларда энг кўп нафрат нишонига айланган футбол клуби бўлди. Бу ҳақда Испаниянинг ирқчилик ва ксенофобияга қарши Обсерватория маълумотига таяниб, “Mundo deportivo” нашри хабар берди.

Клублар кесимида тузилган ушбу ноодатий рейтингда “Реал Мадрид” 34 фоиз билан етакчилик қилмоқда. Унинг ортидан 32 фоиз кўрсаткич билан “Барселона” жойлашган. Учинчи поғонани 17 фоиз билан “Реал Вальядолид” эгаллаган бўлса, кейинги ўринларда “Валенсия” (8%), “Атлетик Бильбао” клуби (6%), “Реал Сосьедад” (5%) ва “Атлетико Мадрид” (4%) қайд этилган.

Индивидуал ўйинчилар бўйича ҳам ноодатий рейтинг тузиб чиқилган. Таҳлил натижаларига кўра, Испаниянинг энг кўзга кўринган ёш истеъдодларидан бири “Барселона” ҳужумчиси Ламин Ямаль ижтимоий тармоқдаги ҳақоратларнинг асосий нишонига айланган. Ҳисоботда қайд этилишича, футболчиларга қаратилган барча нафратли постларнинг 60 фоизи айнан Ямалга тегишли.

Рейтингда Ямаль ортидан Винисиус Жуниор (29%), Килиан Мбаппе (3%), шунингдек, Нико Уильямс, Иньяки Уильямс, Алехандро Бальде ва Браим Диас каби футболчилар 2 фоиз атрофидаги кўрсаткичлар билан қайд этилган.

Тадқиқотга кўра, айниқса “Эл-Класико” ўйинлари атрофида ижтимоий тармоқларда ҳақорат, камситиш ва қўпол мунозаралар сони кескин кўпайган.

Ҳисобот Испания футбол экотизимида онлайн нафратнинг қанчалик чуқур илдиз отганини яна бир бор кўрсатди. Юлдуз футболчилар, хусусан ёшларга қаратилган бу нафратлар спорт муҳитидан анча ошиб кетиб, жиддий ижтимоий муаммо тусини олмоқда.