“Реал Мадрид” “Барселона” футболчисига қизиқиш билдирмоқда

“Реал Мадрид” жамоаси 2026 йилги Жаҳон чемпионати финалида ғалаба голини урган Испания терма жамоаси ҳужумчиси Ферран Торресни ўз сафига қўшиб олиш имкониятини кўриб чиқмоқда. Бу ҳақда “L’Equipe” нашри хабар берди.

26 ёшли футболчи 2022 йилдан буён “Барселона” шарафини ҳимоя қилиб келмоқда. Унинг каталонияликлар билан амалдаги шартномаси 2027 йил июнига қадар мўлжалланган.

Шунингдек, Ферран Торресга Франциянинг “Пари Сен-Жермен” клуби ҳам қизиқиш билдираётган эди. Жаҳон чемпионати финалидан сўнг Торресга қизиққан жамоалар сони кўпайди. Футболчининг ўзи эса ҳозирча “Барселона” билан шартномани узайтириш ниятида эмас.

Маълумот учун, футболчилик фаолияти давомида Торрес “Барселона” билан уч марта Испания чемпиони, уч марта Испания Суперкубоги соҳиби ва бир марта Испания Кубоги ғолиби бўлган.

Бундан ташқари, у “Валенсия” ва “Манчестер Сити” клублари сафида ҳам тўп сурган. “Манчестер Сити” билан Англия чемпионлиги ва Англия Лига кубогини, “Валенсия” билан эса Испания Кубогини қўлга киритган.

Испания терма жамоаси сафида Ферран Торрес 2023 йилги Миллатлар лигаси ва 2024 йилги Европа чемпионатида ғолиб чиққан. Шунингдек, у финалдаги голи эвазига 2026 йилги Жаҳон чемпионатда ҳам чемпион бўлди.